ਯਾਦਾਂ ਦੇ ਦੀਪ ਬਾਲ ਕੇ
ਕੁੱਝ ਲਿਖ ਕੁੱਝ ਗਾ ਲੈਂਦਾ ਹਾਂ
ਬੱਦਲਾਂ ਤੇ ਲਿੱਖ ਸਿਰਨਾਵਾਂ
ਤੈਨੂੰ ਖਤ ਪਾ ਦੇਂਦਾ ਹਾ
ਦਿਨ ਢਲਦੇ ਦਿਲ ਵੀ ਢਲਦਾ
ਤਾਂ ਦੋ ਪੈਗ ਲਾ ਲੈਂਦਾ ਹਾ
ਰੱਬ ਦੇ ਨਾ ਤੋਂ ਵੀ ਜ਼ਿਆਦਾ
ਯਾਰਾ ਤੇਰਾ ਨਾਂ ਲੈਂਦਾ ਹਾਂ
ਜਾਂ ਜਾਨੇ ਜਾਂ ਕਿਆ ਤੋਂ ਕਿਆ ਹੋ ਗਈ
ਤੇਰੀ ਤਰ੍ਹਾਂ ਬੇਵਫਾ ਹੋ ਗਈ
ਦਿਲ ਦੀ ਜ਼ਰਖੇਜ਼ ਜ਼ਮੀਂ ਤੇ
ਉਲਫਤ ਬੀ ਸੁੱਟੇ ਸੀ
ਕੀ ਦੱਸਾਂ ਸੁੱਕ ਗਏ ਨੇ ਸਭ
ਜੋ ਪੁੰਗਰੇ ਫੁੱਟੇ ਸੀ
ਹੁਣ ਤਾਂ ਉਗ ਆਈ ਓਥੇ
ਕੰਡਿਆਲੀ ਥੋਹਰ ਕੁੜੇ
ਸ਼ਿਕਰੇ ਹੱਡਾਂ ਨੂੰ ਨੋਚਣ
ਉਡ ਗਏ ਨੇ ਮੋਰ ਕੁੜੇ
ਉਮਰਾਂ ਦੀ ਪੀੜ ਕਿਊਂ ਰਜ਼ਾ ਹੋ ਗਈ
ਤੇਰੀ ਤਰ੍ਹਾਂ ਬੇਵਫਾ ਹੋ ਗਈ
ਗੁਪਚੁਪ ਗੁਪਚੁਪ
ਚੁੱਪ ਚੁੱਪ ਚੁੱਪ ਚੁੱਪ
ਤੱਕ ਕੈਸੀ ਹਾਲਤ ਹੋ ਗਈ
ਪੜਿਆ ਲਿਖਿਆ ਸਭ ਭੁਲਿਆ
ਤਾਲੀਮ ਜਹਾਲਤ ਹੋ ਗਈ
ਪੱਛੋਂ(ਪਛਵਾ) ਦੀ ਹਵਾ ਤੇ ਲੱਭਦਾ
ਸ਼ੰਦਲੀ ਤੇਰੀ ਪੈੜ ਕੁੜੇ
ਚੰਗਾ ਚੱਲਦਾਂ ਨਹੀ ਮੁੜਨਾ
ਮੁੜ ਤੇਰੇ ਸ਼ਹਿਰ ਕੁੜੇ
ਧੜਕਨ ਮੇਰੀ ਬੇ ਵਸਾਹ ਹੋ ਗਈ
ਤੇਰੀ ਤਰ੍ਹਾਂ ਬੇਵਫਾ ਹੋ ਗਈ
ਸੂਹੇ ਫੁੱਲਾਂ ਨਾਲ ਲੱਦਿਆ
ਗੁਲਾਬ ਸ਼ਜ਼ਰ ਲਗਦਾ ਸੀ
ਬਾ-ਵਜ਼ੂ ਹੋ ਛੂਹਣ ਤੋਂ
ਤਾਂ ਵੀ ਕਿਊਂ ਡਰ ਲਗਦਾ ਸੀ
ਓਹਨੂੰ ਪਾਉਣੇ ਨੂੰ ਬੰਨੇ
ਮੋਢੇ ਤਾਵੀਜ਼ ਕਈ
ਥਾਂ ਥਾਂ ਤੇ ਸਜਦੇ ਕੀਤੇ
ਨਾ ਛੱਡੀ ਦਹਿਲੀਜ਼ ਕੋਈ
ਪੱਥਰ ਤੋਂ ਫਿਰ ਓਹ ਖੁਦਾ ਹੋ ਗਈ
ਰੱਬ ਦੀ ਤਰ੍ਹਾਂ ਬੇਵਫਾ ਹੋ ਗਈ