ਉਹ ਜਾਣ ਗਿਆ ਸੀ
ਬੁੱਚੜਖਾਨਿਆਂ ਦੀ ਖ਼ਸਲਤ।

ਵਾਕਿਫ਼ ਹੋ ਗਿਆ ਸੀ
ਨੀਚਾਂ ਅੰਦਰ ਨੀਚ ਜਾਤਿ ਦੀਆਂ
ਮਾਰੀਆਂ ਜਾਂਦੀਆਂ ਟਾਹਰਾਂ ਓਹਲੇ
ਨਾਨਕ ਨੂੰ ਜ਼ਲੀਲ ਕਰਨ ਦੀਆਂ
ਸਾਜ਼ਿਸ਼ਾਂ ਤੋਂ।

ਮਾਨਸ ਕੀ ਜਾਤਿ ਕੋ
ਸਬੈ ਏਕੈ ਪਹਿਚਾਨਬੋ ਦੇ ਦਾਅਵਿਆਂ ਹੇਠ੍ਹਾਂ
ਉਹ ਮਰਾਸੀ ਹੀ ਗਿਣਿਆ ਗਿਆ।

ਗੋਲ੍ਹਕ
ਉਸ ਨੂੰ ਰਾਸ ਨਹੀਂ ਆਈ
ਉਹ ਗੋਲ੍ਹਕ ਨੂੰ ਰਾਸ ਆ ਗਿਆ ਸੀ
ਗੋਬਿੰਦ, ਨਾਨਕ, ਰਵੀਦਾਸ
ਅਤੇ ਨਾਮਦੇਵ ਵਾਂਗੂੰ।

ਨਾਨਕ ਨੂੰ
ਅੰਮ੍ਰਿਤ ਛਕਾਉਣ ਵੇਲੇ

ਗੋਬਿੰਦ ਨੂੰ
ਖੂੰਡੇ ਬੰਨ੍ਹਣ ਵੇਲੇ

ਸਾਹਿਬਜ਼ਾਦਿਆਂ ਨੂੰ
ਤੱਕੜੀ ਤੋਲਣ ਵੇਲੇ

ਬਾਣੀ ਨੂੰ
ਰਗੜਾ ਲਾਉਣ ਵੇਲੇ
ਉਹ ਗ਼ੈਰਹਾਜ਼ਰ ਹੀ ਰਿਹਾ

ਨਹੀਂ ਤੇ ਉਸਨੇ ਵੀ
ਆਕੀ ਰਹੇ ਨਾ ਕੋਇ ਦੇ
ਪਟੇ 'ਤੇ ਚੜ੍ਹਕੇ
ਮਲਿਕ ਭਾਗੋ ਦਾ ਚਾਕਰ ਹੋ ਜਾਣਾ ਸੀ।

ਹਰਿਮੰਦਰ
ਕੰਬ ਰਿਹਾ ਹੈ

ਅਕਾਲ ਤਖ਼ਤ
ਢਹਿ ਢੇਰੀ ਹੋ ਗਿਆ ਹੈ

ਪੰਜ ਪਿਆਰਿਆਂ ਨੇ
ਸਾਹ ਸੂਤ ਲੲੇ ਹਨ

ਜ਼ਫ਼ਰਨਾਮਾ
ਏਦਾਂ ਹੀ ਲਿਖਿਆ ਜਾਂਦਾ ਹੈ।

~ ਸੁਰਜੀਤ ਗੱਗ

ਜ਼ਫ਼ਰਨਾਮਾ ਲਿਖਣ ਵਾਲੇ ਪਾਤਸ਼ਾਹ ਦਾ ਕੋਈ ਸਾਨੀ ਨਹੀਂ