ਬੇਹੇ ਅੱਖਰਾਂ ਵਿੱਚ
ਤਾਜ਼ਾ ਅਰਥ ਭਰ ਦੇ
ਮੁਰਦਾ ਪੱਥਰਾਂ ਤਾਈਂ
ਧੜਕਾ ਦੇ ਵੇ
ਨਿਗ੍ਹਾ ਆਪਣੀ ਦੀ
ਸੂਹੀ ਲਾਟ ਅੰਦਰ
ਮੇਰੇ ਅੰਦਰਲਾ ਨ੍ਹੇਰਾ
ਮਚਾ ਦੇ ਵੇ
ਤਨ ਦੀ ਬੰਸਰੀ ਨੂੰ
ਛੁਹ ਦੇ ਪੋਟਿਆਂ ਸੰਗ
ਵਿੱਸਰੇ ਗੀਤ ਮੁੜਕੇ
ਗੂੰਜਣ ਲਾ ਦੇ ਵੇ
ਮੇਰੀ ਹਿੱਕ ਵਿਚਲੇ
ਮਾਤਮਖਾਨਿਆਂ ਨੂੰ
ਕੋਈ ਖ਼ੁਸ਼ੀ ਦੀ ਖ਼ਬਰ
ਸੁਣਾ ਦੇ ਵੇ

ਭੁੱਲ ਹੋ ਗਈ
ਨਿਆਮਤਾਂ ਮੰਗ ਬੈਠੀ
ਖ਼ਤਾਵਾਰ ਹਾਂ
ਮੈਨੂੰ ਸਜ਼ਾ ਦੇ ਵੇ
ਮੇਰੇ ਝੁਕੇ ਹੋਏ ਮੱਥੇ 'ਤੇ
ਮਾਰ ਠੋਕਰ
ਮੇਰੇ ਮਾਣ ਦਾ ਸ਼ੀਸ਼ਾ
ਤਿੜਕਾ ਦੇ ਵੇ
ਮੇਰੇ ਅੰਤਲੇ ਨੀਰ
ਸੁਕਾ ਦੇ ਵੇ
ਮਛਲੀ ਵਾਂਗਰਾਂ
ਮੈਨੂੰ ਤੜਫਾ ਦੇ ਵੇ
ਨਾਦਰਸ਼ਾਹਾਂ, ਚੰਗੇਜ਼ਾਂ
ਹਲਾਕੂਆਂ ਨੂੰ
ਮੇਰੇ ਜ਼ਾਲਮਾਂ ਵੇ
ਮਾਤ ਪਾ ਦੇ ਵੇ

ਜੇ ਤੂੰ ਦਿਲੋਂ ਰਹੀਮ
ਕਰੀਮ ਏਂ ਤਾਂ
ਸਿਰਫ ਏਨਾ ਕੁ
ਕਰਮ ਕਮਾ ਦੇ ਵੇ
ਪਈ ਕਬਰ ਵਿੱਚ ਨੰਗੀ
ਇਸ ਲਾਸ਼ ਉੱਤੇ
ਦੋ ਕੁ ਮੁੱਠੀਆਂ
ਮਿੱਟੀ ਹੀ ਪਾ ਦੇ ਵੇ ~

wonderful poetry,...........no doubt in that,..............An intriguing creation,.........that is capable of arousing interest of a reader,...........Great writer you are veer,............jio.