ਤਿੱਤਲੀ ਨਾਲ ਝਗੜਾ ਅਤੇ ਸੁਲਾਹ
ਨਾਰ: ਤਿੱਤਲੀਏ ਸੋਹਣੀਏ ਨੀ ਰੰਗਾਂ ਦੀਏ ਰਾਣੀਏ,
ਤੀਜਾਂ ਦੀ ਵੀ ਆਪਣੇ ਈ ਰੰਗਾਂ ਦੀ ਕਹਾਣੀ ਏ ।
ਤੈਨੂੰ ਫੁੱਲ ਭਰਮਾਉਂਦੇ, ਮੈਂ ਤਾਂ ਮਾਹੀ ਭਰਮਾਇਆ ਏ,
ਉਹਦੇ ਅੰਗ ਲੱਗ ਮੈਂਨੂੰ ਰੂਪ ਚੜ੍ਹ ਆਇਆ ਏ ।
ਫੁੱਲਾਂ ਤੇ ਵੀ ਰੂਪ ਦਾ ਰੋਹਬ ਤੂੰ ਜਮਾਨੀ ਏ,
ਮੇਰੇ ਤੋਂ ਵੀ ਮੱਲੋ-ਮੱਲੀ ਪਿਆਰ ਲੈ ਜਾਨੀ ਏ।
ਤਿੱਤਲੀਏ ਸੋਹਣੀਏ ਨੀ ਰੰਗਾਂ ਦੀਏ ਰਾਣੀਏ,
ਤੀਜਾਂ ਦੀ ਵੀ ਆਪਣੇ ਈ ਰੰਗਾਂ ਦੀ ਕਹਾਣੀ ਏ ।
ਰੂਹਾਂ ਪਿਆਰ ਵਾਲੀਆਂ ਆਢਾ ਨਹੀਂ ਲਾਉਂਦੀਆਂ,
ਰੀਝਾਂ ਨਾ’ ਪਿਆਰੇ ਸੰਗ ਰਿਸ਼ਤਾ ਨਿਭਾਉਂਦੀਆਂ।
ਜੇ ਅੱਜ ਮੱਥਾ ਲਾਏਂਗੀ, ਤਾਂ ਬੜਾ ਪੱਛਤਾਂਏਂਗੀ,
ਤੇਰੇ ਰੰਗ ਫਿੱਕੇ ਪੈਣੇ, ਜਾਂ ਮੈਂ ਚੁੰਨੀ ਲਹਿਰਾਉਣੀ ਏ ।
ਤਿੱਤਲੀਏ ਸੋਹਣੀਏ ਨੀ ਰੰਗਾਂ ਦੀਏ ਰਾਣੀਏ,
ਤੀਜਾਂ ਦੀ ਵੀ ਆਪਣੇ ਈ ਰੰਗਾਂ ਦੀ ਕਹਾਣੀ ਏ ।
ਮੁਹਬੱਤਾਂ ਦੀ ਸੱਤ ਰੰਗੀ ਪੀਂਘ ਜੇ ਚੜ੍ਹਾਉਣੀ ਏ, (ਪਿਆਰ ਵਾਲੀ)
ਆਜਾ ਮੇਰੇ ਸੰਗ ਤੂੰ ਵੀ ਤੀਜ ਜੇ ਮਨਾਉਣੀ ਏ ।
ਤਿੱਤਲੀ: ਰੂਪ ਮਤੀਏ ਨੀ ਇੰਨਾਂ ਪਿਆਰ ਦਰਸਾਇਆ ਏ,
ਸ਼ੁਕਰੀਆ ਤੀਜ ਵਿਚ ਮੈਂਨੂੰ ਵੀ ਬੁਲਾਇਆ ਏ।
ਇਕ ਦੂਜੇ ਨਾਲ ਕਿਵੇਂ ਮਿਲ ਕੇ ਹੈ ਤੁਰਨਾ,
ਸਿੱਖ ਲਿਆ ਮੈਂ ਵੀ ਕਿਵੇਂ ਪ੍ਰੀਤ ਨਿਭਾਉਣੀ ਏ
ਨਾਰ: ਤਿੱਤਲੀਏ ਸੋਹਣੀਏ, ਨੀ ਰੰਗਾਂ ਦੀਏ ਰਾਣੀਏ,
ਤੀਜਾਂ ਦੀ ਵੀ ਆਪਣੇ ਈ ਰੰਗਾਂ ਦੀ ਕਹਾਣੀ ਏ ।
ਜਗਜੀਤ ਸਿੰਘ ਜੱਗੀ
