ਸੁਪਨੇ ਦੇ ਵਿੱਚ ਰਾਤੀਂ ਕਈ ਗੁਲਾਬ ਮਿਲੇ
ਦਿਨ ਚੜਦੇ ਹੀ ਜਖ਼ਮੀਂ ਸਾਰੇ ਖੁਆਬ ਮਿਲੇ
ਵਿਕਦੇ ਜਿਮੇਂ ਦੁਕਾਨਾਂ ਦੇ ਤਲਵਾਰਾਂ ਤੀਰ,
ਵਿਕਦੀ ਮੇਰਿਆ ਮੌਲ਼ਾ ਕਿਤੇਂ ਰਬਾਬ ਮਿਲੇ
ਮੈਨੂੰ ਹੈ ਮੰਨਜ਼ੂਰ ਸਜ਼ਾ ਸਭ ਜੁਰਮਾਂ ਦੀ,
ਮੇਰਿਆਂ ਜਖਮਾਂ ਦਾ ਵੀ ਕਿਤੇਂ ਹਿਸਾਬ ਮਿਲੇ
ਲਾਜ਼ਮ ਸੀ ਸਾਡਾ ਵੀ ਧੋਖ਼ਾ ਖਾ ਜਾਣਾ,
ਪੱਥਰਾਂ ਵਰਗੇ ਚਿਹਰੇ ਪਹਿਨ ਨਕਾਬ ਮਿਲੇ
ਉੱਡਦੇ ਰਹੇ ਪਰਿੰਦੇ ਅਪਣੀ ਪਿਆਸ ਲਈ,
ਸੁੱਕੀਆਂ ਨਦੀਆਂ ਗੰਧਲੇ ਸਭ ਤਲਾਬ਼ ਮਿਲੇ
ਏਸ ਉਮੀਦ ਚ਼ ਹੁਣ ਤੀਕਰ ਖ਼ਤ ਲਿਖ਼ਦਾ ਹਾਂ,
ਸ਼ਾਇਦ ਉਸਦਾ ਕਿਧਰੋਂ ਕਿਤੇਂ ਜਬਾਬ ਮਿਲੇ
ਸਾਰੀ ਉਮਰ ਹੀ ਪੜਨੇ ਵਿੱਚ ਬਿਤਾ ਦੇਵਾਂ,
ਤੇਰੇ ਚਿਹਰੇ ਵਰਗੀ ਕੋਈ ਕਿਤਾਬ ਮਿਲੇ
ਮੰਗਦੇ ਰੋਜ਼ ਦੁਆਵਾਂ ਦੇ ਵਿੱਚ ਏਹੋ ਹਾਂ ,
ਮੁੜਕੇ ਰਾਵੀ ਦੇ ਨਾਲ਼ ਫ਼ੇਰ ਚੁਨਾਬ ਮਿਲੇ
ਜੱਗੀ ਜੌਹਲ