ਜੀਵਨ ਜੋਤ ਹਾਂ ਮੈਂ

ਗੱਲ ਸੁਣ ਜਾਂਦਿਆ ਰਾਹੀਆ,

ਇਹ ਪੁੰਨ ਕਮਾ ਜਾ ਵੇ,

ਲੋਅ ਟਿਮਕਦੀ ਦੀਵੇ ਦੀ,

ਵਿਚ ਤੇਲ ਚੁਆ ਜਾ ਵੇ |

ਜੀਵਨ ਜੋਤ ਹਾਂ ਮੈਂ,

ਘਟ ਘਟ ਬਲ ਰਹੀ ਆਂ,

ਸੁਗੰਧ ਇਲਾਹੀ ਹਾਂ,

ਕਣ ਕਣ ਪਲ ਰਹੀ ਆਂ |

ਇਸ ਲੋਅ ਦੀ ਸਹੁੰ ਤੈਨੂੰ,

ਖੁਸ਼ਬੂ ਦੀਆਂ ਕਸਮਾਂ ਵੇ,

ਪਿਆਰ ਨਾਲ ਮਿਲ ਰਹਿਣ  

ਵਰਗੀਆਂ ਜੋ ਸੀ ਰਸਮਾਂ ਵੇ,

ਕਿਸੇ ਜੁਗਤੀਂ ਉਨ੍ਹਾਂ ਦੀਆਂ,

ਮੁਹਾਰਾਂ ਮੋੜ ਲਿਆ ਵੇ |

ਗੱਲ ਸੁਣ ਜਾਂਦਿਆ ਰਾਹੀਆ,

ਇਹ ਪੁੰਨ ਕਮਾ ਜਾ ਵੇ |

‘ਸਭ ਤੂੰ ਈ ਤੂੰ’ ਨਾਨਕ ਦੀ

ਉੱਦਾਂ ਈ ਗੂੰਜੇ ਫੇਰ,

ਭਿੰਨੀ ਲੰਘੇ ਰੈਨੜੀ,

ਹੋਏ ਸੁੱਖਾਂ ਭਰੀ ਸਵੇਰ,   

ਕੀਲ ਇਲਾਹੀ ਰਾਗ ਨਾਲ,

ਨਫ਼ਰਤ ਦੇ ਬਿਸੀਅਰ ਨੂੰ,

ਕਿਸੇ ਅਥਾਹ ਡੁੰਘਾਈ ਵਾਲੇ,

ਅਨ੍ਹੇ ਖੂਹ ਪਾ ਜਾ ਵੇ |

ਗੱਲ ਸੁਣ ਜਾਂਦਿਆ ਰਾਹੀਆ,

ਇਹ ਪੁੰਨ ਕਮਾ ਜਾ ਵੇ |

ਨਾ ਨਸਲੀ ਮਸਲੇ ਸੀ,

ਸਭ ਰਲ ਕੇ ਰਹਿੰਦੇ ਸੀ,

ਨਾ ਫ਼ਿਰਕੂ ਝਗੜੇ ਸੀ,     

ਇਕ ਦੂਜੇ ਨੂੰ ਸਹਿੰਦੇ ਸੀ |

ਉਸ ਸਬਰ ਦੀ ਸਹੁੰ ਤੈਨੂੰ, 

ਏਕੇ ਦੀਆਂ ਕਸਮਾਂ ਵੇ,

ਮੁੜ ਸਾਂਝਾਂ ਤੇ ਹੇਜ ਨਾਲ

ਜੂਹਾਂ ਮਹਿਕਾ ਜਾ ਵੇ |

ਗੱਲ ਸੁਣ ਜਾਂਦਿਆ ਰਾਹੀਆ,

ਇਹ ਪੁੰਨ ਕਮਾ ਜਾ ਵੇ |

ਜ਼ਹਿਰ ਫਿਜ਼ਾ ਤੇ ਦਿਲਾਂ ਵਿਚ,

ਹਰ ਪਾਸਿਓਂ ਮਾਰ ਪਵੇ,

ਨਿੱਤਰੇ ਸੱਜਣ ਬਣਕੇ

ਮੇਰੀ ਕੋਈ ਤੇ ਸਾਰ ਲਵੇ |

ਇੱਕ ਦੂਜੇ ਦੀ ਰੱਤ ਨੂੰ 

ਹੋਣੀ ਕੁਰਲਾਉਂਦੀ ਏ 

ਹੁਣ ਬੰਦੇ ਨੂੰ ਬੰਦੇ ਤੋਂ ਹੀ

ਬੂ ਪਈ ਆਉਂਦੀ ਏ |

ਅਉਝੜ ਰਾਹੇ ਪਿਆਂ ਨੂੰ,

ਸਿਧੇ ਰਾਹ ਪਾ ਜਾ ਵੇ |

ਗੱਲ ਸੁਣ ਜਾਂਦਿਆ ਰਾਹੀਆ,

ਇਹ ਪੁੰਨ ਕਮਾ ਜਾ ਵੇ |

ਜਗਜੀਤ ਸਿੰਘ ਜੱਗੀ

Annotations:

ਭਿੰਨੀ - ਸੁਖ ਸ਼ਾਂਤੀ ਜਾਂ ਪ੍ਰੇਮ ਦੀ ਰੋਸ਼ਨੀ ਨਾਲ ਭਰੀ; ਹੇਜ - ਪ੍ਰੇਮ ਪਿਆਰ, ਮੇਲ ਮਿਲਾਪ; ਅਉਝੜ - ਖ਼ਤਰਨਾਕ, ਮੁਸ਼ਕਿਲ, ਔਕੜਾਂ ਭਰਿਆ; 

 

Very nice poetry sir........

 

ਥੈਂਕਿਯੂ ਮਨਿੰਦਰ ਜੀ |

ਤੁਸੀਂ ਸਮਾਂ ਕੱਢਿਆ ਕਿਰਤ ਲਈ |

ਜਿਉਂਦੇ ਵੱਸਦੇ ਰਹੋ | 

 

ਵਾਹ ,,,,! sir g ਬਹੁਤ ਖੂਬ ਰੂਹ ਖੁਸ਼ ਹੋ ਗਈ ਪੜ੍ਹ ਕੇ ,...................Title ,lyrics and picturization all are superb .............once again its a fabulous writing from our great writer,.............. ਧੰਨਵਾਦ 

ਧੰਨਵਾਦ ਸੁਖਪਾਲ ਬਾਈ ਜੀ, ਤੁਸੀ ਹਮੇਸ਼ਾ ਦੀ ਤਰਾਂ ਕਿਰਤ ਲਈ ਆਪਣਾ ਕੀਮਤੀ ਸਮਾਂ ਕੱਢਿਆ ਅਤੇ ਬਣਦਾ ਤਣਦਾ ਮਾਨ ਵੀ ਕੀਤਾ |