ਤੁਹਾਨੂੰ ਕੀ ਲੱਗਦੈ ?
ਤੁਹਾਡੇ ਇਸ ਦੰਭ ਮੂਹਰੇ
ਮੇਰੇ ਕੋਲ ਕਰਨ ਲਈ
ਸਿਰਫ਼ ਖੁਦਕੁਸ਼ੀ ਬਚੇਗੀ
ਜਾਂ
ਮੈਂ ਮਹਾਂਨਗਰ ਦੀ ਕਿਸੇ ਦਫ਼ਤਰਨੁਮਾ ਰੂੜੀ 'ਤੇ ਬੈਠਾ
ਖਬਰਾਂ ਦੇ ਅੰਬ ਚੂਸਾਂਗਾ,
ਜਾਂ
ਮੈਂ ਮੁਹੱਬਤ ਵਰਗੀ ਕੋਈ ਸੋਹਣੀ ਗੱਲ ਕਰਨ ਲਈ
ਤਾਰਿਆਂ ਦਾ ਦੇਸ ਭਾਲਾਂਗਾ
ਤੇ ਵਿਕਾਸ ਦੇ ਮੱਥੇ ਤੋਂ ਨੁੱਚੜਦੇ ਇਸ ਗੰਦੇ ਪਸੀਨੇ ਨੂੰ
ਤੁਸੀਂ ਸਾਡੀ ਜ਼ਿੰਦਗੀ ਕਹਿੰਦੇ ਰਹੋਗੇ

ਦੇਖੋ,
ਤੁਹਾਡੀ ਇਸ ਦਲਦਲ ਵਿਚ ਖਖਲ ਪਾਉਣ ਦੀ
ਕਿੰਝ ਅਸੀਂ ਪੱਕੀ ਧਾਰੀ ਹੈ
ਹੁਣ ਸਮਿਆਂ ਦੇ ਕੰਢੇ ਤੋਂ ਉੱਛਲ ਕੇ
ਲਹੂ ਜਿਥੇ ਵੀ ਡੁੱਲ੍ਹੇਗਾ
ਉਥੇ ਹੀ ਤੁਹਾਡੀ ਹਾਰ ਦੇ ਨਕਸ਼ ਬਣਨਗੇ।
ਕੰਬਦੇ ਹੋਏ ਹੱਥਾਂ ਦੀਆਂ ਤਲੀਆਂ ਨੇ
ਅੱਜ ਤੁਹਾਡੇ ਦੰਭ ਦੀ ਕਤਲਗਾਹ ਬਣਨਾ ਹੈ ~