ਸੀ ਧੁੱਪਾਂ ਦੇ ਗਿੱਧੇ ਤੇ ਮੇਲਣ ਹਵਾਵਾਂ
ਹੁਣ ਧੂੰਏਂ 'ਚ ਕਿਦਾਂ ਜੀ ਖੇਲਣ ਹਵਾਵਾਂ
ਕੀ ਖੇਲਣ ਨਿਆਣੇ ਕੀ ਵਿਚਰਨ ਸਿਆਣੇ
ਅਸੀਂ ਕੰਮ ਕੀਤੇ ਨੇ ਖੁਦ ਜਾਨਖਾਣੇ

ਚੱਲੇ ਸੀ ਕਿਥੋਂ, ਕਿੱਥੇ ਆ ਗਏ ਹਾਂ
ਅਸੀਂ ਆਪਣੇ ਹਿੱਸੇ ਦੀ ਲੋਅ ਖਾ ਗਏ ਹਾਂ
ਅਸੀਂ ਮੈਲਾ ਕੀਤਾ ਏ ਕੁਦਰਤ ਦਾ ਜਾਮਾ
ਸਿਰ ਸਾਡੇ ਲਿਸ਼ਕੇ, ਕਈ ਰੁੱਖਾਂ ਦਾ 'ਲਾਮ੍ਹਾਂ

ਕਿੱਥੇ ਲੈ ਕੇ ਜਾਣਾ ਏਂ ਸਾਨੂੰ ਇਹ 'ਦੌੜਾਂ'
ਅਸੀਂ ਲਾ-ਲਾ ਕੇ ਡੀਕਾਂ ਪੀਵੀ ਜਾਈਏ ਔੜਾਂ
ਜੇ ਦਿਖਦਾ ਹੈ ਕਰਦੇ ਨਹੀਂ ਕਿਉਂ ਫਿਰ ਹੀਲੇ
ਰੰਗ ਸੂਹੇ ਗੁਲਾਬੀ ਪਈ ਜਾਣ ਨੀਲੇ

ਧਰਤੀ ਦੇ ਪੁੱਤਰੋ, ਧਰਤੀ ਨਾ ਰੁੱਸ ਜੇ
ਕਾਹਲਾਂ ਦੇ ਵਿਚ ਕਿਧਰੇ ਜੀਵਨ ਨਾ ਖੁੱਸ ਜੇ
ਆਪਣੇ ਆਸੇ-ਪਾਸੇ ਨੂੰ 'ਸੁੰਭਰੋ-ਸਵਾਰੋ'
ਕਿਤੇ ਝੁੱਲਜੇ ਨਾ ਝੱਖੜ, ਹੱਥ ਅਕਲਾਂ ਨੂੰ ਮਾਰੋ

ਜੀ ਕੁਦਰਤ ਦਾ ਰੋਸਾ ਸਾਥੋਂ ਝੱਲਿਆ ਨਹੀਂ ਜਾਣਾ
ਗਿਆ 'ਪਲਟ' ਵਰਕਾ ਤਾਂ ਥੱਲਿਆ ਨਹੀਂ ਜਾਣਾ ~

lajwaab