Facebook scrolling karde time ae rachna Wal nazar payi te parh k lageya iss to behtar hor ki ho sakda h?
So here it is for punjabizum family, shayad aap sab nu v achha lage parh k :)
ਮੈਂ ਜਦ ਵੀ ਸੋਚਦਾ ਹਾਂ ਕਿ ਤੂੰ ਕਿਸ ਵਰਗੀ ਹੈਂ,
ਤਾਂ ਸਭ ਤੋਂ ਪਹਿਲਾਂ ਮੈਨੂੰ ਚੰਨ ਦਾ ਖਿਆਲ ਆਉਂਦਾ ਹੈ,
ਜੋ ਉਨੀਂਦਰੇ ਮਾਰੀਆਂ ਰਾਤਾਂ ਚ ਵੀ ਮੇਰੇ ਨਾਲ ਹੁੰਦਾ ਹੈ,
ਜੋ ਆਪਣੀ ਦੁਧੀਆ ਚਾਨਣੀ ਨਾਲ ਹਨੇਰੇ ਨੂੰ ਰੁਸ਼ਨਾਉਂਦਾ ਹੈ,
ਤੇ ਮੇਰੇ ਸੰਗ ਇਕਲਾਪੇ ਦਾ ਸੰਤਾਪ ਹੰਢਾਉਂਦਾ ਹੈ,
,
ਤੇ ਜਦ ਮੈਂ ਤੈਨੂੰ ਚੰਨ ਆਖਣ ਲੱਗਦਾ ਹਾਂ
ਤਾਂ ਮੇਰੇ ਜ਼ਿਹਨ ਵਿਚ ਤਾਰੇ ਆਉਂਦੇ ਨੇ
ਇੱਕ ਨਹੀਂ ਦੋ ਨਹੀ, ਸਾਰੇ ਦੇ ਸਾਰੇ ਆਉਂਦੇ ਨੇ,
ਕਾਲੀ ਰਾਤ 'ਚ ਟਿਮਟਮਾਉਂਦੇ ਨੇ,
ਆਕਾਸ਼ ਨੂੰ ਹੀਰਿਆਂ ਜੜੀ ਚਾਦਰ ਵਾਂਗ ਸਜਾ ਦਿੰਦੇ,
ਜੁੜਿਆਂ ਨੂੰ ਗਿਣਦੇ ਗਿਣਦੇ ਸਭ ਗਮ ਭੁੱਲ ਜਾਂਦੇ,
ਤੇ ਸੁਣਿਆਂ ਕਿ ਇਹ ਟੁਟਦੇ ਵੀ ਰੀਝ ਪੁਗਾ ਦਿੰਦੇ,
ਮੈਂ ਤੈਨੂੰ ਤਾਰਿਆਂ ਵਰਗੀ ਲਿਖਣ ਲੱਗਦਾ ਹਾਂ
,
ਤੇ ਅਚਾਨਕ ਮੇਰਾ ਧਿਆਨ ਸੂਰਜ ਵੱਲ ਜਾਂਦਾ ਹੈ,
ਜੋ ਆਪਣੀ ਤਪਸ਼ ਤੇ ਰੌਸ਼ਨੀ ਨਾਲ ਕੁਲ ਕਾਇਨਾਤ ਨੂੰ ਜਿਉਦਿਆਂ ਰੱਖਦਾ ਹੈ,
ਅੱਗ ਵਾਂਗਰ ਰਹਿੰਦਾ ਭੱਖਦਾ ਹੈ,
,
ਅੱਗ ਦਾ ਜ਼ਿਕਰ ਹੁੰਦੇ ਹੀ ਮੇਰੀ ਸੋਚ ਅੱਗ ਵੱਲ ਨੂੰ ਚਲੀ ਜਾਂਦੀ ਹੈ,
ਤੇ ਤੂੰ ਮੈਨੂੰ ਅੱਗ ਵਰਗੀ ਜਾਪਣ ਲੱਗਦੀ ਹੈਂ
ਜੋ ਦਗਦੀ ਹੈ, ਮਘਦੀ ਹੈ,
ਹੱਦਾਂ ਤੋਂ ਪਾਰ,
ਪਿੰਜਰਿਆਂ ਤੋਂ ਬਾਹਰ,
,
ਫਿਰ ਮੈਂ ਸੋਚਦਾ ਹਾਂ ਕਿ ਅੱਗ ਨੂੰ ਪਾਣੀ ਨਾਲ ਬੁਝਾਇਆ ਜਾਂਦਾ ਹੈ,
ਕਿਤੇ ਤੂੰ ਪਾਣੀ ਵਰਗੀ ਤਾਂ ਨਹੀਂ?
ਹਾਂ। ਜਿਵੇਂ ਤੇਰਾ ਕੋਈ ਰੰਗ ਨਹੀਂ,
ਤੂੰ ਸਤਿਹ ਤੋਂ ਤਲ ਤੀਕਰ ਸਾਫ ਤੇ ਪਾਰਦਰਸ਼ੀ ਹੈਂ,
ਮੇਰੇ ਦਿਲ ਦੀ ਔੜਾਂ ਮਾਰੀ ਜ਼ਮੀਨ ਤੇ ਰਹਿਮਤ ਬਣ ਵਰਸੀ ਹੈਂ,
,
ਪਰ ਪਰਦਰਸ਼ੀ ਤਾਂ ਹਵਾ ਵੀ ਹੁੰਦੀ ਹੈ
ਹੋ ਸਕਦੈ ਤੂੰ ਹਵਾ ਵਰਗੀ ਹੋਵੇਂ,
ਬੇ ਰੋਕ ਆਜ਼ਾਦ ਹਸਤੀ,
ਮਹਿਕਾਂ ਵੰਡਦੀ ਜ਼ਿੰਦਗੀ ਬਖਸ਼ਦੀ,
ਹਰ ਕੋਨੇ ਵਿਚ ਮੌਜੂਦ
ਧਰਤੀ ਤੋਂ ਅੰਬਰ ਤੱਕ ਤੇਰਾ ਵਾਜੂਦ,
,
ਧਰਤੀ ਦਾ ਨਾਂ ਸੁਣਦਿਆਂ ਹੀ ਮੈਂ ਤੈਨੂੰ ਧਰਤੀ ਵਰਗੀ ਸੋਚਣ ਲੱਗਦਾ ਹਾਂ,
ਜੋ ਸਭ ਸਹਿੰਦੀ ਹੈ,
ਸੰਤੁਲਿਤ ਜਿਹੀ ਰਹਿੰਦੀ ਹੈ,
ਜਿੰਦਗੀ ਉਗਾਉਣ ਦੀ ਸਮਰੱਥਾ ਰੱਖਦੀ ਹੈ,
ਹਰ ਸ਼ੈਅ ਨੂੰ ਖੁਦ 'ਚ ਸਮਾਉਣ ਦਾ ਜਜ਼ਬਾ ਰੱਖਦੀ ਹੈ,
,
ਇਹ ਸੋਚਦਿਆਂ ਸੋਚਦਿਆਂ ਮੈਂ ਕਸ਼ਮਕਸ਼ 'ਚ ਪੈ ਜਾਂਦਾ ਹਾਂ,
ਆਖਿਰ ਕੀ ਲਿਖਾਂ ਤੈਨੂੰ,
ਚੰਨ, ਤਾਰੇ, ਸੂਰਜ, ਅਗਨ,ਪਾਣੀ ਹਵਾ ਜਾਂ ਧਰਤੀ,
ਤੂੰ ਮੈਨੂੰ ਹਰ ਸ਼ਹਿ ਵਿਚ ਮੋਜੂਦ ਲੱਗਦੀ ਹੈਂ
ਜਾ ਇਸ ਤਰ੍ਹਾਂ ਕਹਿ ਲਵਾਂ
ਕਿ ਹਰ ਸ਼ਹਿ ਤੇਰਾ ਵਜੂਦ ਲੱਗਦੀ ਹੈ,
,
ਆਖਰ ਮੈਨੂੰ ਯਾਦ ਆਇਆ,
ਕਿ ਮੈਂ ਅਕਸਰ ਤੈਨੂੰ ਕੁਦਰਤ ਵਰਗੀ ਆਖਦਾ ਹਾਂ,
ਉਹ ਸੱਚ! ਫਿਰ ਮੈਂ ਠੀਕ ਹੀ ਤਾਂ ਆਖਦਾ ਹਾਂ,
ਤੂੰ ਸੱਚ ਮੁਚ ਕੁਦਰਤ ਵਰਗੀ ਹੀ ਹੈਂ,
ਅਤੇ ਅੱਜ ਇਹ ਸਾਬਿਤ ਵੀ ਹੋ ਗਿਆ ਹੈ।
ਹੁਣ ਮੈਂ ਤੈਨੂੰ ਕੁਦਰਤ ਵਰਗੀ ਆਖ ਕੇ 'ਸੰਤੁਸ਼ਟ' ਮਹਿਸੂਸ ਕਰ ਰਿਹਾ ਹਾਂ।
,
ਲਿਖਤ-ਪ੍ਰਭ ਸਿੰਘ
,
Like on Facebook
https://m.facebook.com/i.will.cure.u
|
