ਦੁਕਾਨ ਅੱਗੇ ਖੜਿਆਂ ਦੀ
ਉਂਗਲ ਚੁੱਕੀ ਲਿਟਦੇ ਬੱਚੇ ਨੇ ਪੈਂਟ ਨਹੀ ਛੱਡੀ
ਤਾਂ ਤੁਸੀਂ ਮੇਰੇ ਤੇ ਕਵਿਤਾ ਲਿਖੀ
ਪਤੀ ਜਵਾਨੀ ਚ ਮਰ ਗਿਆ
ਦੂਜਾ ਸਾਕ ਨਹੀ ਹੋਇਆ
ਤਾਂ ਤੁਸੀਂ ਮੇਰੀ ਯਸ਼ੋਧਰਾ ਤੇ ਕਲਮ ਘਸਾਈ
ਕਿਸੇ ਯਤੀਮ ਬਚੇ ਦਾ "ਆਪਾਂ" ਕਿਹਾ ਤੁਹਾਨੂੰ "ਪਾਪਾ" ਲੱਗਾ
ਤਾਂ ਹਮੇਸ਼ਾ ਰਾਹੁਲ ਯਾਦ ਆਇਆ
ਮੇਰੇ ਟੱਬਰ ਦੇ ਸਿਰ ਤੇ ਤੁਸੀਂ ਕਵੀ ਅਖਵਾਉਂਦੇ ਓ
ਫਿਰ ਵੀ
ਤੁਸੀਂ ਹਮੇਸ਼ਾਂ ਮੇਰਾ ਨਾ ਇੰਝ ਲਿਆ
ਜਿਵੇ ਮੈਂ ਤੁਹਾਡੀ ਭੂਆ ਦਾ ਪੁੱਤ ਹੋਵਾਂ
ਜਿਸ ਕੋਲੋਂ "ਸਮਾਜਿਕ ਸਿਖਿਆ" ਦੀ ਕਮਪਾਰਟਮੈਂਟ ਹੱਲ ਨਹੀ ਹੋਈ
ਤੁਹਾਨੂੰ ਮੇਰੀ ਰਹਿਬਰੀ ਤੇ ਸ਼ੱਕ ਏ
ਤੁਹਾਡੇ ਰਾਹ ਵੀ ਵਖਰੇ ਨੇ
ਫਿਰ ਕਿਓਂ ਮਿਲਦੇ ਓ ਮੈਨੂੰ ਵਲ ਪਾ ਕੇ ?
ਤੇ ਕਰਦੇ ਓ ਗੱਲਾਂ ਤੂੰ ਤੂੰ ਕਰਕੇ
ਜਿਵੇ ਮੈਂ ਤੁਹਾਨੂੰ
ਪੈਲੀ ਦਾ ਕਬਜਾ ਦੇਣ ਤੋਂ ਆਕੀ ਹੋਵਾਂ

ਗ਼ੁਸਤਾਖ਼