ਮਾਤਾ ਗੁਜਰੀ

 

( ਮਾਤਾ ਗੁਜਰ ਕੌਰ ਜੀ ਦੇ ਜੇਰੇ ਅਤੇ ਸ਼ਹਾਦਤ ਨੂੰ ਇਕ ਸ਼ਰਧਾਂਜਲੀ )

 

ਤਵਾਰੀਖ ਦੱਸਦੀ ਏ...

 

ਮੁਤੱਸਬੀ ਅੱਗ ਦਾ

ਉੱਥੇ ਸੇਕ ਵੱਸਿਆ, 

ਕਦੇ ਸੀ ਠੰਢ ਜਿੱਥੇ

ਪੰਜ ਪਾਣੀਆਂ ਗੁਜਰੀ |

 

ਹੋਣੀ ’ਤੇ ਵਕਤ ਨੇ

ਕੀਹ ਕੀਹ ਰੰਗ ਬਦਲੇ,  

ਇੱਥੇ ਦੇਵ ਰੂਹਾਂ ਤੇ ਵੀ

ਕਿਸ ਤਰਾਂ ਗੁਜਰੀ |

 

ਲਾਲ ਚੰਦ ਜੀ ਤੇ

ਮਾਤ ਬਿਸ਼ਨ ਸਿਦਕੀ,

ਜ਼ਿੰਦਗੀ ਉਨ੍ਹਾਂ ਦੀ

ਇਸ ਜਗ੍ਹਾਂ ਗੁਜਰੀ |

 

ਮੇਹਰ ਕਾਦਰ ਦੀ

ਹੋਈ ਇਨ੍ਹਾਂ ਉੱਤੇ,

ਲੱਛਮੀ ਘਰ ਆਈ

ਬਣ ਕੰਨਿਆਂ ਗੁਜਰੀ |

 

ਕਦੇ ਕਦੇ ਈ

ਧਾਰਦੀ ਰੂਪ ਸ਼ਕਤੀ,

ਇਹ ਸਮਝਿਓ ਨਾ

ਨਿਰਾ ਨਾਂ ਗੁਜਰੀ |

 

ਕਿਸੇ ਪਰਿਚੈ ਵਿਚੋਲਗੀ

ਦੀ ਮੁਹਤਾਜ ਨਹੀਂ ਜੋ,

ਕੈਸੀ ਸ਼ਖਸੀਅਤ ਸੀ,

ਕੀਹ ਦੱਸਾਂ ਗੁਜਰੀ |

 

ਜਿਹਨੂੰ ਅੱਟਕ ਵੀ

ਹੱਸ ਕੇ ਦਏ ਰਸਤਾ,

ਐਸੇ ਖਾਲਸੇ ਦੇ

ਪਿਓ ਦੀ ਮਾਂ ਗੁਜਰੀ |

 

ਧਰਮ ਦੇ ਮਾਰਗ ਦਾ

ਅਡੋਲ ਚਾਨਣ ਮੁਨਾਰਾ,     

ਡਰ ਕੇ ਪਿਛਾਂਹ ਮੁੜਨਾ

ਜਾਣਦੀ ਨਾਂਹ ਗੁਜਰੀ |

 

ਜੋ ਕੌਮ ਮਰਨ ਸਿੱਖੇ,

ਜੀਉਣ ਦਾ ਹੱਕ ਜਿੱਤੇ, 

ਅਪੂਰਵ ਸਬਕ ਦਿੱਤਾ

ਨਿਜ ਪੋਤਿਆਂ ਗੁਜਰੀ |

 

ਸੋਹਣੇ ਪਾ ਜੋੜੇ,

ਨਿਸ਼ਚੇ ਦੇ ਚਾੜ੍ਹ ਘੋੜੇ,

ਕਲਗੀ ਜਿੱਤ ਦੀ ਲਾਈ,

ਨਾਲ ਹੱਥਾਂ ਗੁਜਰੀ |

 

ਘਰ ਦੇ ਚਿਰਾਗ਼ਾਂ ਦੇ

ਜੇਰੇ ਦੀ ਵੱਟ ਬੱਤੀ, 

ਕੀਤੀ ਲੋਅ ਦੀ ਜੁਗਤ 

ਹਰ ਥਾਂ ਗੁਜਰੀ |

 

ਠੰਢੇ ਬੁਰਜ ਤੋਂ

ਦਾਦੀ ਨੇ ਦੇਖਿਆ,

ਮਾਸੂਮ ਜਿੰਦਾਂ ਨਾਲ

ਜੋ ਹੇਠਾਂ ਗੁਜਰੀ |

 

ਬੁਝੇ ਦਿਲਾਂ 'ਚ               

ਦੱਖ ਦੀ ਲੋਅ ਕਰਕੇ,

ਸ਼ਾਂਤ ਹੋਈ ਆਖਿਰ

ਇਉਂ ਸ਼ਮਾਂ ਗੁਜਰੀ |

                   ਜਗਜੀਤ ਸਿੰਘ ਜੱਗੀ

 

Sir ji ਜਿੰਨਾ ਵੀ ਲਿਖੀਏ ਥੋੜਾ ਹੀ ਜਾਪਦਾ ਹੈ ਮਾਤਾ ਗੁਜਰੀ ਜੀ ਬਾਰੇ,

ਬਹੁਤ ਹੀ ਖੂਬਸੂਰਤ ਕਵਿਤਾ ਸਾਰੀ ਦੀ ਸਾਰੀ,

and ਮੇਰੀ favorite lines

"ਕਦੇ ਕਦੇ ਈ ਧਾਰਦੀ ਰੂਪ ਸ਼ਕਤੀ 

ਇਹ ਸਮਝਿਓ ਨਾ ਨਿਰਾ ਨਾਂ ਗੁਜਰੀ"

&

"ਜਿਹਨੂੰ ਅਟੱਕ ਵੀ ਹੱਸ ਕੇ ਦਏ ਰਸਤਾ 

ਐਸੇ ਖਾਲਸੇ ਦੇ ਪਿਓ ਦੀ ਮਾਂ ਗੁਜਰੀ"

 

ਘਰ ਦੇ ਚਿਰਾਗਾਂ ਦੇ
ਜੇਰੇ ਦੀ ਵੱਟ ਬੱਤੀ
ਕੀਤੀ ਲੋਅ ਦੀ ਜੁਗਤ
ਹਰ ਥਾਂ ਗੁਜਰੀ

ਬਹੁਤ ਸੋਹਣਾ ਲਿਖਿਆ ਬਾਈ ਜੀ..

 

ਅਮਨਦੀਪ ਅਤੇ ਗਗਨਦੀਪ ਜੀ, ਮਾਤਾ ਜੀ ਅਤੇ ਛੋਟੇ ਸਾਹਿਬਜ਼ਾਦਿਆਂ ਬਾਰੇ ਲਿਖਤ ਤੇ ਫੁਲ ਚੜ੍ਹਾਉਣ ਲਈ ਬਹੁਤ ਬਹੁਤ ਸ਼ੁਕਰੀਆ !

ਲਿਖਦੇ ਪੜ੍ਹਦੇ ਰਹੋ ਅਤੇ ਫ਼ੋਰਮ ਦੀ ਸ਼ਾਨ ਕਾਇਮ ਰੱਖੋ !

ਜਿਉਂਦੇ ਵਸਦੇ ਰਹੋ,  ਰੱਬ ਰਾਖਾ !  

 

ਮਾਤਾ ਗੁਜਰੀ ਜੀ ਨੂੰ ਹਰ ਵੇਲੇ ਪ੍ਰਣਾਮ 

 

 

 

ਸੁਖਪਾਲ ਬਾਈ ਜੀ,

ਸਾਹਿਬ-ਏ-ਕਮਾਲ ਦੇ ਮਾਤਾ ਜੀ ਉੱਤੇ ਰਚੀ ਗਈ ਕਿਰਤ ਤੇ ਨਜ਼ਰਸਾਨੀ ਕਰਨ ਲਈ ਬਹੁਤ ਬਹੁਤ ਸ਼ੁਕਰੀਆ ਜੀ !

ਰੱਬ ਰਾਖਾ ! 

 

 

ਇਸ ਫ਼ੋਰਮ ਤੇ ਵਿਚਰਦੀਆਂ ਸਾਰੀਆਂ ਪੰਜਾਬੀ ਮਾਂ ਬੋਲੀ ਪ੍ਰੇਮੀ ਰੂਹਾਂ ਨੂੰ ਸਤ ਸ੍ਰੀ ਆਕਾਲ ਜੀ | 

ਸਮੇਂ ਦਾ ਚੱਕਰ ਚਲਦਿਆਂ ਚਲਦਿਆਂ ਫਿਰ ਉਸੇ ਥਾਂ ਆਣ ਪਹੁੰਚਿਆ ਹੈ ਜਿੱਥੇ ਮਾਤਾ ਗੁਜਰੀ ਅਤੇ ਛੋਟੇ ਸਾਹਿਬਜ਼ਾਦਿਆਂ ਦੀ ਸ਼ਹਾਦਤ ਦਾ ਦ੍ਰਿਸ਼ ਅਤੇ ਹਾਲਾਤ ਸਾਡੇ ਮਨ ਮਸਤਕ ਤੇ ਛਾ ਜਾਂਦੇ ਹਨ |

 

ਆਓ ਉਨ੍ਹਾਂ ਮਹਾਨ ਦੇਵ ਰੂਹਾਂ ਨੂੰ ਆਪਣੀ ਸ਼ਰਧਾਂਜਲੀ ਭੇਟ ਕਰੀਏ |