ਸਰਕਾਰ-ਏ-ਹਿੰਦੁਸਤਾਨ ਦੀਆਂ ਆਰਥਿਕ ਨੀਤੀਆਂ ਨੂੰ ਰੂਪਮਾਨ ਕਰਦੀ ਹੋਈ "ਸੁਭਾਸ਼ ਦੀਵਾਨਾ" ਜੀ ਦੀ ਇੱਕ ਰਚਨਾ ਆਪ ਸਭ ਨਾਲ ਸਾਂਝਿਆਂ ਕਰਨ ਜਾ ਰਿਹਾ ਹਾਂ, ਜੋ ਕਿ 'ਸੰਗਰਾਮੀ ਲਹਿਰ' ਦੇ ਮਾਰਚ ਅੰਕ ਚ ਛਪੀ ਹੈ..... ਉਮੀਦ ਹੈ ਪਸੰਦ ਆਵੇਗੀ...
ਹੁਣ ਆਪਾਂ ਇਹ ਮੁਲਕ ਚਲਾਉਣਾ ਠੇਕੇ 'ਤੇ|
ਮੁੱਢੋਂ ਇੱਕ ਇਤਹਾਸ ਲਿਖਾਉਣੈਂ ਠੇਕੇ 'ਤੇ|
ਵੇਚ ਘੱਤਣੈਂ ਅੱਜ ਤੱਕ ਜੋ ਬਣਿਆਂ ਹੈ,
ਫਿਰ ਤੋਂ ਸਾਰਾ ਕੰਮ ਕਰਾਉਣੈਂ ਠੇਕੇ 'ਤੇ|
ਪ੍ਰਭੂਸੱਤਾ ਨੂੰ, ਇੱਜ਼ਤ, ਗੈਰਤ, ਸ਼ੁਹਰਤ ਨੂੰ,
ਕਿਤੇ ਡੂੰਘੇਰੀ ਥਾਂ ਦਫਨਾਉਣੈਂ ਠੇਕੇ 'ਤੇ|
ਸਿੱਖਿਆ ਸਿਹਤ ਤੋਂ ਲੈਕੇ ਬਾਰਡਰ ਰੱਖਿਆ ਤੀਕ,
ਟੈਂਡਰ ਲੈ ਕੇ ਕੰਮ ਚੜ੍ਹਾਉਣੈਂ ਠੇਕੇ 'ਤੇ|
ਰੈਡੀਮੇਡ ਮੰਗਵਾਕੇ ਨੀਤੀਆਂ ਫੌਰਨ ਤੋਂ,
ਉਹਨਾਂ ਨੂੰ ਲਾਗੂ ਕਰਵਾਉਣੈਂ ਠੇਕੇ 'ਤੇ|
ਢਾਹ ਦੇਣੇ ਸਰਕਾਰੀ ਸੈਕਟਰ ਪਰਲੂ ਨਾਲ,
ਨਿੱਜੀ ਰਾਕਸ਼ - ਰਾਹ ਪਧਰਾਉਣੈਂ ਠੇਕੇ 'ਤੇ|
ਦੂਰ ਗਰੀਬੀ ਕਰ ਦੇਣੀ ਇਸ ਹਿਕਮਤ ਨਾਲ,
ਲਾਚਾਰਾਂ ਨੂੰ ਮਾਰ ਮੁਕਾਉਣੈਂ ਠੇਕੇ 'ਤੇ|
ਹੋਰ ਵੀ ਗੱਲਾਂ ਕਰਨੀਆਂ ਨੇ ਮੈਂ ਰਾਜ ਦੀਆਂ,
ਕੱਲ੍ਹ ਤਰਕਾਲੀਂ ਫਿਰ ਮੈਂ ਆਉਣੈਂ ਠੇਕੇ 'ਤੇ|