ਸਤਿ ਕਰਤਾਰ ਦੀ ਪਤਨੀ ਸੁਖਜਿੰਦਰ ਕੌਰ ਨੂਰਪੁਰੀ ਦਾ ਕਹਿਣਾ ਸੀ ਕਿ ਜੇ ਵਿਦੇਸ਼ ਤੋਂ ਮੰਗਵਾਈ ਦਵਾਈ ਜਾਰੀ ਰਹਿੰਦੀ ਤਾਂ ਤੰਦਰੁਸਤੀ ਵੱਲ ਪਰਤ ਰਹੇ ਸਤਿ ਕਰਤਾਰ ਦੀ ਸਿਹਤਯਾਬੀ ’ਚ ਤੇਜ਼ੀ ਆ ਜਾਣੀ ਸੀ। ਲਗਾਤਾਰ ਬੈੱਡ ’ਤੇ ਲੰਮੇ ਪਏ ਰਹਿਣ ਕਾਰਨ ਸਤਿ ਕਰਤਾਰ ਦੇ ਸਰੀਰ ’ਤੇ ਜ਼ਖ਼ਮ ਹੋ ਗਏ ਹਨ। ਪਰਿਵਾਰ ਨੇ ਉਸ ਦੀ ਦਵਾਈ ਅਮਰੀਕਾ ਤੋਂ ਮੰਗਵਾਈ ਜਿਸ ਨਾਲ ਉਸ ਨੂੰ ਕਾਫੀ ਰਾਹਤ ਮਿਲੀ ਤੇ ਉਸ ਦੇ ਦਿਮਾਗ ਦੇ ਇਲਾਜ ਲਈ ਪਰਿਵਾਰ ਪੂਰਾ ਜ਼ੋਰ ਲਾ ਰਿਹਾ ਹੈ ਪਰ ਬਹੁਤਾ ਫਰਕ ਨਜ਼ਰ ਨਹੀਂ ਆ ਰਿਹਾ। ਦਿਮਾਗ ਦੇ ਇਲਾਜ ਲਈ ਉਨ੍ਹਾਂ ਇੰਟਰਨੈੱਟ ਰਾਹੀਂ ਸਿੰਘਾਪੁਰ ਤੋਂ ਦਵਾਈ ਮੰਗਵਾਈ। ਇਸ ਦਵਾਈ ਨਾਲ ਸਤਿ ਕਰਤਾਰ ਦਾ ਸਰੀਰ ਹਰਕਤ ਵਿਚ ਆ ਗਿਆ ਤੇ ਉਹ ਹੱਥ ਪੈਰ ਹਿਲਾਉਣ ਲੱਗ ਪਿਆ।
ਜਲੰਧਰ ਦੇ ਮਾਡਲ ਹਾਊਸ ਖੇਤਰ ’ਚ ਸਥਿਤ ਘਰ ਦੇ ਤੰਗ ਜਿਹੇ ਵਿਹੜੇ ’ਚ ਖੁੱਲ੍ਹੇ ਦਿਲ ਨਾਲ ਮਿਲਣ ਵਾਲੇ ਨੂਰਪੁਰੀ ਪਰਿਵਾਰ ਨੂੰ ਰੱਬ ’ਤੇ ਪੂਰਾ ਭਰੋਸਾ ਹੈ। ਉਨ੍ਹਾਂ ਨੂੰ ਸ਼ਿਕਵਾ ਤਾਂ ਉਨ੍ਹਾਂ ਸਾਹਿਤਕਾਰਾਂ ’ਤੇ ਹੈ ਜਿਹੜੇ ਨੰਦ ਲਾਲ ਨੂਰਪੁਰੀ ਦਾ ਨਾਂ ਤਾਂ ਬੜੇ ਚਾਅ ਨਾਲ ਲੈਂਦੇ ਹਨ ਪਰ ਉਸ ਦੇ ਪਰਿਵਾਰ ਦੀ ਖ਼ਬਰ ਲੈਣ ਲਈ ਅੱਜ ਤੱਕ ਕੋਈ ਨਹੀਂ ਆਇਆ। ਸੁਖਜਿੰਦਰ ਨੂਰਪੁਰੀ ਨੇ ਗੱਲਬਾਤ ਦੌਰਾਨ ਉਦੋਂ ਅੱਖਾਂ ਨਮ ਕਰ ਲਈਆਂ ਜਦੋਂ ਉਸ ਨੇ ਦੱਸਿਆ ਕਿ ਪਿਛਲੇ ਚਾਰ ਸਾਲਾਂ ਤੋਂ ਉਨ੍ਹਾਂ ਨੇ ਕਿਸੇ ਅੱਗੇ ਝੋਲੀ ਨਹੀਂ ਅੱਡੀ ਪਰ ਸਾਡਾ ਕੋਈ ਹਾਲ-ਚਾਲ ਹੀ ਪੁੱਛ ਜਾਂਦਾ ਤਾਂ ਸਾਨੂੰ ਦੁੱਖ ਭੁਲਾਉਣਾ ਸੌਖਾ ਹੋ ਜਾਂਦਾ। ਬੋਲਣ ਤੋਂ ਅਸਮਰੱਥ ਆਪਣੇ ਪਤੀ ਦੀਆਂ ਅੱਖਾਂ ਝਪਕਣ ਨਾਲ ਹੀ ਸੁਖਜਿੰਦਰ ਕੌਰ ਉਸ ਦੇ ਦਿਲ ਦਾ ਹਾਲ ਜਾਣ ਲੈਂਦੀ ਹੈ।
ਦੋ ਕਮਰਿਆਂ ਵਾਲੇ ਇਸ ਘਰ ਦਾ ਇਕ ਕਮਰਾ ਤਾਂ ਕਿਸੇ ਹਸਪਤਾਲ ਵਾਂਗ ਲੱਗਦਾ ਹੈ। ਸਤਿ ਕਰਤਾਰ ਦਾ ਬੈੱਡ ਵੀ ਹਸਪਤਾਲ ਵਾਲਾ ਹੈ। ਘਰ ਵਿਚ ਦਵਾਈਆਂ ਇਕ ਕਲੀਨਿਕ ਵਾਂਗ ਟਿਕਾ ਕੇ ਰੱਖੀਆਂ ਹੋਈਆਂ ਹਨ। ਛਾਤੀ ’ਚ ਰੇਸ਼ਾ ਜੰਮ ਜਾਣ ’ਤੇ ਸਾਹ ਆਉਣ ’ਚ ਤਕਲੀਫ ਹੋਣ ’ਤੇ ਸੁਖਜਿੰਦਰ ਕੌਰ ਨੂਰਪੁਰੀ ਘਰ ’ਚ ਰੱਖੀ ਮਸ਼ੀਨ ਚਲਾ ਕੇ ਛਾਤੀ ’ਚੋਂ ਰੇਸ਼ਾ ਕੱਢਦੀ ਹੈ। ਉਸ ਨੂੰ ਨੱਕ ਵਿਚ ਲੱਗੀ ਪਾਈਪ ਰਾਹੀਂ ਹੀ ਖਾਣ ਲਈ ਕੁਝ ਦਿੱਤਾ ਜਾਂਦਾ ਹੈ ਤੇ ਉਸ ਦੇ ਗਲੇ ਵਾਲੀ ਨਾੜੀ ’ਚ ਲੱਗੀ ਵਿਸਲ ਕੁਝ ਦਿਨ ਪਹਿਲਾਂ ਹੀ ਕੱਢੀ ਗਈ ਹੈ।
ਗੱਲਬਾਤ ਦੌਰਾਨ ਉਸ ਨੇ ਸਹਿਜ ਭਾਅ ਦੱਸਿਆ ਕਿ ਕਿਸੇ ਵੀ ਸਰਕਾਰ ਨੇ ਉਨ੍ਹਾਂ ਦੇ ਪਰਿਵਾਰ ਦੀ ਸਾਰ ਨਹੀਂ ਲਈ। ਉਨ੍ਹਾਂ ਦੱਸਿਆ ਕਿ ਸਰਕਾਰ ਨੇ ਨੰਦ ਲਾਲ ਨੂਰਪੁਰੀ ਦੀ ਜਨਮ ਸ਼ਤਾਬਦੀ ਸਮੇਂ ਇਕ ਨੀਂਹ ਪੱਥਰ ਰੱਖਣ ਤੋਂ ਸਿਵਾਏ ਕੁਝ ਨਹੀਂ ਕੀਤਾ। ਇਕ ਪਾਰਕ ਵਿਚ ਲਾਇਬਰੇਰੀ ਬਣਾਉਣ ਦਾ ਨੀਂਹ ਪੱਥਰ ਰੱਖਿਆ ਸੀ ਪਰ ਉਥੇ ਸੁੱਟੀਆਂ ਇੱਟਾਂ ਵੀ ਲੋਕ ਚੁੱਕ ਕੇ ਲੈ ਗਏ। ਨੰਦ ਲਾਲ ਨੂਰਪੁਰੀ ਦੇ ਪੋਤੇ ਇੰਦਰਜੀਤ ਨੂਰਪੁਰੀ ਦਾ ਕਹਿਣਾ ਸੀ ਕਿ ਸਰਕਾਰ ਦੀਆਂ ਫਾਈਲਾਂ ਵਿਚ ਤਾਂ ਨੰਦ ਲਾਲ ਨੂਰਪੁਰੀ ਮਾਰਗ ਹੈ ਪਰ ਸਤਹਿ ’ਤੇ ਕਿਧਰੇ ਵੀ ਇਸ ਦੀ ਕੋਈ ਨਿਸ਼ਾਨੀ ਨਹੀਂ ਦਿਸਦੀ।  ਨੂਰਪੁਰੀ ਦੇ ਗੀਤ ਅੱਜ ਵੀ ਪੰਜਾਬੀਆਂ ਦੀ ਜ਼ੁਬਾਨ ’ਤੇ ਹਨ। ਮਰਹੂਮ ਸੁਰਿੰਦਰ ਕੌਰ ਦੇ ਗਾਏ ਗੀਤ ‘ਮੈਨੂੰ ਦਿਓਰ ਦੇ ਵਿਆਹ ਵਿਚ ਨੱਚ ਲੈਣ ਦੇ’ ਅਤੇ ‘ਗੋਰੀ ਦੀਆਂ ਝਾਂਜਰਾਂ ਬੁਲਾਉਂਦੀਆਂ ਗਈਆਂ’ ਅੱਜ ਵੀ ਲੋਕ ਦਿਲਾਂ ’ਚ ਵਸੇ ਹੋਏ ਹਨ। ‘ਚੁੰਮ-ਚੁੰਮ ਰੱਖੋ ਨੀਂ ਇਹ ਕਲਗੀ ਜੁਝਾਰ ਦੀ’ ਗੀਤ ਸੁਣ ਕੇ ਅੱਜ ਵੀ ਅੱਖਾਂ ਨਮ ਹੋ ਜਾਂਦੀਆਂ ਹਨ। ‘ਬੀਤ ਗਈ ’ਤੇ ਰੋਣਾ ਕੀ’, ‘ਵਤਨ ਦਾ ਸ਼ਹੀਦ’, ‘ਜੱਟੀਆਂ ਪੰਜਾਬ ਦੀਆਂ’ ਆਦਿ ਅਜਿਹੇ ਗੀਤ ਹਨ ਜਿਨ੍ਹਾਂ ਨੂੰ ਨੰਦ ਲਾਲ ਨੂਰਪੁਰੀ ਨੇ ਰੂਹ ਤੋਂ ਗਾਇਆ ਤੇ ਇਹ ਗੀਤ ਅੱਜ ਵੀ ਰੂਹ ਅੰਦਰ ਲਹਿ ਜਾਂਦੇ ਹਨ।
ਕਾਂਗਰਸ ਦੇ ਮੇਅਰ ਰਹੇ ਜੈ ਕਿਸ਼ਨ ਸੈਣੀ ਨੇ 1993-94 ’ਚ ਰਵੀਦਾਸ ਚੌਕ ਤੋਂ ਮਾਡਲ ਹਾਊਸ ਨੂੰ ਜਾਂਦੀ ਸੜਕ ਦਾ ਨਾਂ ਨੰਦ ਲਾਲ ਨੂਰਪੁਰੀ ਮਾਰਗ ਰੱਖਿਆ ਸੀ ਪਰ ਅੱਜ ਵੀ ਉਨ੍ਹਾਂ ਦੇ ਨਾਂ ’ਤੇ ਰੱਖੇ ਮਾਰਗ ’ਤੇ ਚਾਰ ਸਾਲ ਪਹਿਲਾਂ ਕੂਚੀ ਫੇਰ ਦਿੱਤੀ ਗਈ।

ਪਾਲ ਸਿੰਘ ਨੌਲੀ

ਬਹੁਤ ਹੀ ਦੁਖ ਦੀ ਗੱਲ ਬਿੱਟੂ ਵੀਰ .....ਨੰਦ ਲਾਲ ਨੂਰਪੁਰੀ ਜੀ ਦਾ ਨਾਮ ਵਰਤਣ ਵਾਲੇ ਜਰਾ ਸ਼ਰਮ ਕਰਨ ......ਸਤਿ ਕਰਤਾਰ ਜੀ ਦੀ ਸਿਹਤਯਾਬੀ ਲਈ ਪਰਮਾਤਮਾ ਅੱਗੇ ਜੋਦੜੀ ਕਰਦੇ ਹਾਂ .....ਵਾਹਿਗੁਰੂ ਭਲੀ ਕਰਨ

ਪ੍ਰਮਾਤਮਾ ਅਗੇ ਅਰਦਾਸ ਕਰਦੇ ਹਾਂ ਕੇ
ਉਨਾਂ ਦੀ ਸੇਹਤ ਠੀਕ ਹੋ ਜਾਵੇ ..

Kinney dukh dee gall ae eh..te Kehan noo te MAHARAJA RANJIT SINGH wala raaj ae saade soobey 'ch...

ehna HAAKMAAN noo aapniyan tijoriyan bharan ton vehal milu taan hee oh shayad Noorpuri varge parivaraan ware sochangey....

Lakh laahnat eho jihiyan hakoomataan de....

ਸਰਕਾਰ ਦਾ ਤਾਂ ਪਤਾ ਹੀ ਹੈ ਪਰ ਸਾਹਿਤਕਾਰਾਂ ਨੂੰ ਤਾ ਸ਼ਰਮ ਆਉਣੀ ਚਾਹੀਦੀ ਹੈ !!!!!!!!!!!!!

So Sad.....ਆਓ ਆਪਾਂ ਸਾਰੇ ਓਹਨਾ ਦੇ ਜਲਦੀ ਠੀਕ ਹੋਣ ਲਈ ਅਕਾਲਪੁਰਖ ਨੂ ਬੇਨਤੀ ਕਰੀਏ....