( ਕੁਦਰਤ )
ਇਹਨਾਂ ਪੱਤਿਆਂ ਨੇ ਅੱਜ ਕਿਉਂ ਰੌਲਾ ਪਾਇਆ ਏ,
ਲੱਗਦਾ ਏ ਇਹਨਾਂ ਚ ਕੋਈ ਅੱਜ ਨਵਾਂ ਆਇਆ ਏ।
ਵੇਖੋ ਫੁੱਲਾਂ ਨੇ ਮਹਿਕ ਖਿਲਾਰੀ ਹਰਿਆਵਲ ਚਾਰੇ ਪਾਸੇ,
ਪਾਣੀ ਜਿਵੇਂ ਇਹਨਾਂ ਨੂੰ ਕਿਸੇ ਬੁੱਕਾਂ ਨਾਲ ਪਿਆਇਆ ਏ।
ਕੋਈ ਮੀਹਾਂ ਵਿਚ ਨੱਚਦਾ ਤੇ ਕੋਈ ਹਵਾਵਾਂ ਵਿਚ ਗਾਉਂਦਾ,
ਅੱਜ ਬੱਦਲ ਜਿਵੇਂ ਇਹਨਾਂ ਤੇ ਖ਼ੁਸ਼ੀਆਂ ਦਾ ਛਾਇਆ ਏ।
ਮੈਨੂੰ ਥੋੜਾ ਥੋੜਾ ਸੁਣਿਆ ਤੇ ਦਿਲ ਵਿਚ ਉਤਰ ਗਿਆ,
ਜਿਵੇਂ ਗੀਤ ਕਿਸੇ ਨੇ ਦੂਰ ਮਿੱਠਾ ਜਿਹਾ ਗਾਇਆ ਏ।
ਅੱਜ ਝੂਮਣ ਟਾਹਣੀਆਂ ਤੇ ਖਿੜ ਖਿੜ ਹੱਸਣ ਪੱਤੀਆਂ,
ਲੱਗੇ ਜਿਵੇਂ ਰੁੱਖਾਂ ਨੂੰ ਕਿਸੇ ਗਲ਼ ਨਾਲ ਲਾਇਆ ਏ।
ਕਿਤੇ ਮੋਰ ਨੇ ਪੈਲਾਂ ਪਾਉਂਦੇ ਤੇ ਕਿਤੇ ਚਿੜੀਆਂ ਕੂਕਦੀਆਂ,
ਮੇਰੇ ਦਿਲ ਨੂੰ ਚੰਗਾ ਲੱਗਦਾ ਜੋ ਗੀਤ ਇਹਨਾਂ ਗਾਇਆ ਏ।
ਕੀ ਮੁੱਲ ਹੈ ਸਾਡੇ ਕੋਲ ਇਸ ਕੁਦਰਤ ਨੂੰ ਦੇਣ ਲਈ,
ਕਿਉਂ ਆਪਣੇ ਆਪ ਲਈ ਅਸੀਂ ਇਹਦਾ ਉਜਾੜਾ ਪਾਇਆ ਏ।
ਆਓ ਰਲ ਮਿਲ ਚੁੱਕੀਏ ਬੀੜਾ ਕੁਦਰਤ ਨੂੰ ਸਾਂਭਣ ਦਾ,
ਵੇਖ 'ਤਕੀਪੁਰ' ਕੁਦਰਤ ਨੇ ਸਾਨੂੰ ਕਿੰਨਾ ਕੁਝ ਵਖਾਇਆ ਏ।
ਗੁਰਜੰਟ ਤਕੀਪੁਰ
|