ਕਾਦਰ, ਕੁਦਰਤ ਤੇ ਕੋਰੋਨਾ

ਮੰਨ ਗਏ ਆਂ ਅੱਜ

ਜੋ ਵੱਡੇ ਕਹਿੰਦੇ ਸੀ 

ਸਿਰਜਣਹਾਰ ਦੇ ਰੰਗ

ਨਿਆਰੇ ਹੁੰਦੇ ਨੇ |

ਉਹਦੇ ਸਬਕ ਸਿਖਾਉਣ

ਵਾਲੇ ਦਾਅ ਮੂਹਰੇ  

ਬੜੇ ਬੜੇ ਭਲਵਾਨ

ਨਕਾਰੇ ਹੁੰਦੇ ਨੇ |

ਆਈ ਤੇ ਆ, 

ਨਜ਼ਰ ਉਪੱਠੀ ਜੇ ਕਰ ਦਏ

ਤੀਰ ਵਾਂਗਰਾਂ ਸਿੱਧੇ

ਸਾਰੇ ਹੁੰਦੇ ਨੇ |

ਕੁਦਰਤ ਨੇ ਜਦ ਢਾਹਿਆ

ਕਹਿਰ ਕੋਰੋਨਾ ਦਾ 

ਬੰਦੇ ਲੁਕ ਗਏ ਜਿਵੇਂ

ਵਿਚਾਰੇ ਹੁੰਦੇ ਨੇ |

ਕਿੱਥੇ ਗਈ ਸਿਆਣਪ ਤੇਰੀ ?

ਬੈਠਾ ਏਂ ਕਿਉਂ ਢਾਅ ਕੇ ਢੇਰੀ ?  

ਫਲ ਮਿਲਦਾ ਹੈ ਉਹੋ  

ਜਿਹੋ ਜੇ ਕਾਰੇ ਹੁੰਦੇ ਨੇ |

ਹੁਣ ਕਿਉ ਪਹਿਲਾਂ ਵਾੰਙੂ

ਸੂਰਜ ਢਲਦਿਆਂ ਈ

ਅੱਖਾਂ ਸਾਹਵੇਂ

ਚੰਨ ਤੇ ਤਾਰੇ ਹੁੰਦੇ ਨੇ ?

ਪਉਣ ਪਾਣੀ ਹੋ ਸਾਫ਼

ਵਿਗਸਨਾ ਜੀਵਾਂ ਦਾ

ਕੁਦਰਤ ਦੇ ਮੁਸਕਾਨ

ਇਸ਼ਾਰੇ ਹੁੰਦੇ ਨੇ |

ਧੀਅ ਦੇ ਅੱਲ੍ਹੜ ਹਾਸੇ

ਬਾਬਲ ਵਿਹੜੇ ਜਿਉਂ

ਫੁਲਝੜੀਆਂ ਰੰਗੀਨ

ਸ਼ਰਾਰੇ ਹੁੰਦੇ ਨੇ,

ਟਾਂਵਾਂ ਟਾਂਵਾਂ

ਤਿੱਤਰ ਖੰਭੀ ਬਦਲੀ ਦੇ 

ਨੀਲੇ ਅੰਬਰ ਵਿਚ

ਨਜ਼ਾਰੇ ਹੁੰਦੇ ਨੇ |

        ਜਗਜੀਤ ਸਿੰਘ ਜੱਗੀ

 

Glossary:

 

ਕਿਉ - ਕਿਵੇਂ; ਵਿਗਸਨਾ - ਪ੍ਰਸੰਨ ਹੋਣਾ; ਟਾਂਵਾਂ ਟਾਂਵਾਂ - ਕੋਈ ਕੋਈ/ਕਿਧਰੇ ਕਿਧਰੇ; ਤਿੱਤਰ ਖੰਭੀ - Like feathers of a partridge.

 

ਜੀ ਕੁਦਰਤ ਦਾ ਰੋਸਾ ਸਾਥੋਂ ਝੱਲਿਆ ਨਹੀਂ ਜਾਣਾ
ਗਿਆ 'ਪਲਟ' ਵਰਕਾ ਤਾਂ ਥੱਲਿਆ ਨਹੀਂ ਜਾਣਾ ~

ਬਿਲਕੁਲ ਦਰੁਸਤ ਲਿਖਿਆ ਜਗਜੀਤ ਸਰ 🙏🏻
ਆਦਮ ਦੀ ਔਲਾਦ ਨੇ ਸਹਿਜੇ ਸਹਿਜੇ ਆਪਣੇ ਸਿਰਮੌਰ ਹੋਣ ਦੇ ਭਰਮ ਪਾਲ ਲਏ ਅਤੇ ਕੁਦਰਤ ਦੀ ਵਿਸ਼ਾਲਤਾ ਤੇ ਸਰਵਉੱਚਤਾ ਵੱਲ ਪਿੱਠ ਕਰਕੇ ਇਸਨੂੰ ਆਪਣੇ ਅਨੁਸਾਰ ਢਾਲਣ ਦੇ ਯਤਨ ਕੀਤੇ । ਤੇ ਫਿਰ ਕਾਇਨਾਤ ਦਾ ਵੀ ਆਪਣਾ ਲਹਿਜਾ ਹੈ, ਢੰਗ ਹੈ ਜਵਾਬ ਦੇਣ ਦਾ, ਜੋ ਪਲਾਂ 'ਚ ਸਿਫਰ ਕਰ ਦਿੰਦਾ ਹੈ ਸਾਡੇ ਸਰਵਉੱਚ ਹੋਣ ਦੇ ਭਰਮਾਂ ਨੂੰ ।

ਕਿਆ ਬਾਤਾਂ ਹਜ਼ੂਰ  

...... ਬਹੁਤ ਖੂਬ   JAGJIT SINGH

 

ਕੁਦਰਤ ਅੰਗੜਾਈ ਲੈ ਰਹੀ ਹੈ

 

ਬਹੁਤ ਸੋਹਣਾ... ਸਹੀ ਗੱਲ ਹੈ.. ਮਨੁੱਖ ਜੇ ਅਜੇ ਵੀ ਇਸ ਤੋਂ ਸਬਕ ਨਾ ਲੈ ਸਕਿਆ ... ਤਾਂ ਸ਼ਾਇਦ ਕਦੇ ਵੀ ਨਹੀਂ,,

 

ਸਭ ਆਪਣੇ ਵੱਸ ਹੋਣ ਦਾ ਭਰਮ ਪਾਲੇ ਬੈਠੇ ਨੂੰ ਸ਼ੀਸ਼ਾ ਦਿਖਾ ਦਿੱਤਾ ਇਸ ਕੁਦਰਤ ਨੇ ਕਿ  ਤੇਰੀ ਹੋਂਦ ਤਾਂ ਇਕ ਤਿਣਕੇ ਮਾਤਰ ਹੀ ਹੈ 

 

ਅਮੀਂ ਬਾਈ, ਸਤ ਸ੍ਰੀ ਅਕਾਲ ਜੀ |

 

ਕਿਰਤ ਤੇ ਨਜ਼ਰਸਾਨੀ ਕਰਨ ਲਈ ਧੰਨਵਾਦ | ਗੇੜਾ ਮਾਰਦੇ ਰਿਹਾ ਕਰੋ ਕਦੇ ਕਦੇ| Discipline ਕਾਇਮ ਰਹਿੰਦਾ ਹੈ |

 

ਜਿਉਂਦੇ ਵੱਸਦੇ ਰਹੋ ਜੀ | 

Saade Bahut hi sujhwaan shaayar g walon likhi gayi eh kavita bahut hi Gehrai bharbhoor arth darsaundi a,.............Hats of sir g...Great  

ਗਾਫ਼ਲ, ਮਾਵੀ ਜੀ ਅਤੇ ਸੁਖਪਾਲ ਜੀ, ਸਤ ਸ੍ਰੀ ਅਕਾਲ ਜੀ |

 

ਕਿਰਤ ਤੇ ਨਜ਼ਰਸਾਨੀ ਕਰਨ ਲਈ ਧੰਨਵਾਦ | ਆਪਦਾ ਰੀਵਿਊ ਹਮੇਸ਼ਾ ਦੀ ਤਰ੍ਹਾਂ ਹੌਂਸਲਾ ਵਧਾਉਣ ਵਾਲਾ ਅਤੇ ਪਿਆਰ ਵਾਲਾ ਹੈ | ਬਹੁਤ ਧੰਨਵਾਦ |

 

ਜਿਉਂਦੇ ਵੱਸਦੇ ਰਹੋ ਜੀ |ਜਲਦੀ ਹੀ ਵੱਖ ਵੱਖ ਧੰਨਵਾਦ ਲਿਖਾਂਗਾ ਜੀ |