ਜਿਹੜੀ ਸਰਕਾਰ ਸਾਡੀ ਓਹੀ ਏ ਗੁਨਾਹਗਾਰ ਸਾਡੀ ,
ਅਸੀਂ ਲੋਕ ਲੋਕਤੰਤਰ ਨੂੰ ਕਹੀਏ ਚੰਗਾ,
ਪਰ ਲੋਕਤੰਤਰ ਵੀ ਕਰਦੀ ਏ ਵਿਉਪਾਰ ਸਾਡੀ |
ਵੋਟਾਂ ਪਾ ਕੇ ਖੁਸ਼ ਹੋ ਲੈਂਦੇ ਆ, ਚੁਣ ਲਈ ਏ ਆਪਾਂ ਸਰਕਾਰ ਸਾਡੀ,
ਜਿਹੜੀ ਖੁਸ਼ ਕਰਕੇ ਰਵਾਉਂਦੀ ਏ ........... ਸਾਨੂੰ,
ਅਸੀਂ ਓਸੇ ਨੂੰ ਕਹਿੰਦੇ ਆ ਚੁਣੀ ਸਰਕਾਰ ਸਾਡੀ |
ਦਰ ਦਰ ਜਾ ਕੇ ਪਹਿਲਾਂ ਮੰਗਦੇ ਨੇ ਵੋਟਾਂ ,
ਜਿੱਤਕੇ ਜਿੱਤ ਕਰਦੀ ਏ ਦਰਕਿਨਾਰ ਸਾਡੀ |
ਓ ਅਸੀਂ ਲੜਕੇ ਮਰੀਏ ਜਾਂ ਭੁਖੇ ਮਰੀਏ,
ਨਹੀਂਓ ਸੁਣਦੀ ਉਹਦੇ ਕੰਨਾਂ ਨੂੰ ਦਰਕਾਰ ਸਾਡੀ |
ਅਸੀਂ ਸਵਾਲੀ ਤੇ ਓਹ ਦਾਤੀ ਬਣ ਬੈਠੀ,
ਹੁਣ ਰੂਹ ਵੀ ਕਰਦੀ ਆ ਹਾਲ - ਪੁਕਾਰ ਸਾਡੀ |
ਦੇਸ਼ ਲੁੱਟ ਕੇ ਖਾ ਗਏ ਸਾਡੇ ਹਮਦਰਦ ,
ਪੂੰਜੀ ਭੇਜਤੀ ਲੁੱਟਕੇ ਬਾਹਰ ਸਾਡੀ |
ਓਹ ਕਾਲੇ ਦਿਲਾਂ ਦੇ , ਕਾਲੇ ਹੀ ਕਰਨ ਧੰਦੇ ,
ਹੋਵੇ ਤਕੜੇ ਤੇ ਅਮੀਰ ਦੀ ਜੈ-ਕਾਰ ਸਾਥੀ ,
ਜਿੰਨਾ 200 ਸਾਲਾਂ 'ਚ ਸਾਨੂੰ ਅੰਗਰੇਜ ਖਾ ਗਏ ,
ਓੰਨਾ 60 ਸਾਲ 'ਚ ਖਾ ਗਈ ਏ ਪਹਿਰੇਦਾਰ ਸਾਡੀ |
'ਬਰਾੜਾ' ਤੂੰ ਵੀ ਸੱਚ ਨੂੰ ਬਣਿਆ ਝੂਠ ਰਹਿਣ ਦੇ ,
ਨਹੀਂ ਤਾ ਹਸਤੀ ਹੋਵੇਗੀ ਖਜਲ ਖੁਆਰ ਸਾਡੀ |
ਚੰਗਾ ਕੋਈ ਨਹੀਂ , ਮਾੜੇ ਸਾਰੇ ਹੀ ਨੇ ,
ਬਣ ਗਈ ਏ ਰਿਸ਼ਵਤ-ਮਾਇਆ ਵਫ਼ਾਦਾਰ ਸਾਡੀ |
ਜੱਸ ਬਰਾੜ (30102010)