ਜੇਹੜੇ ਸੱਜਣ ਬਹੁਤ ਸੋਹਣੀਆਂ ਸ਼ਕਲਾਂ ਵਾਲੇ ਹੁੰਦੇ ਨੇਂ
ਉਹ ਸੱਜਣ ਤਾਂ ਅਕਸਰ ਹੀ ਦਿਲ ਦੇ ਕਾਲੇ ਹੁੰਦੇ ਨੇਂ
ਜੇਹੜੇ ਹਰ ਮਹਿਫ਼ਿਲ ਵਿੱਚ ਹੱਸਦੇ-ਹਸਾਉਂਦੇ ਰਹਿੰਦੇ ਨੇਂ
ਉਹਨਾਂ ਨੇਂ ਵੀ ਦਿਲਾਂ ਚ' ਕਈ ਦਰਦ ਸੰਭਾਲੇ ਹੁੰਦੇ ਨੇਂ
ਧੀਆਂ ਨੂੰ ਦੁਰਕਾਰ ,ਜੇਹੜੇ ਪੁੱਤਾਂ ਨੂੰ ਹੱਥੀਂ ਛਾਵਾਂ ਕਰਦੇ ਨੇਂ
ਓਹੀ ਜਿਉਣਾਂ ਦੁੱਭਰ ਕਰਦੇ ਨੇਂ ਜੋ ਲਾਡਾਂ ਨਾਲ ਪਾਲੇ ਹੁੰਦੇ ਨੇਂ
ਜ਼ੁਲਮਾਂ ਖ਼ਿਲਾਫ਼ ਖ਼ੜਨ ਵਾਲਿਆਂ ਦੀ ਹਮੇਸ਼ਾ ਥੋੜ ਹੀ ਹੁੰਦੀ ਏ
ਘਰ ਫ਼ੂਕ ਤਮਾਸ਼ਾ ਵੇਖਣ ਵਾਲੇ ਅਕਸਰ ਬਾਹਲੇ ਹੁੰਦੇ ਨੇਂ
ਅਕਸਰ ਓਹੀ ਸਾਨੂੰ ਜਿੰਦਗੀ ਵਿੱਚ ਕੱਲਿਆਂ ਛੱਡ ਜਾਂਦੇ ਨੇਂ
ਜੇਹੜੇ ਸੱਜਣ ਕਦੇ ਅਸੀਂ ਮਰ-ਮਰ ਕੇ ਭਾਲੇ ਹੁੰਦੇ ਨੇਂ
ਮੰਜਲਾਂ ਨੂੰ ਸਰ ਕਰਨ ਲਈ ਬਥੇਰਾ ਤਪ ਕਰਨਾਂ ਪੈਂਦਾ ਏ
ਇਹ ਕਦੇ ਸੁਖਾਲੀ ਨਹੀਂ ਮਿਲਦੀ ਇਹਦੇ ਰਾਹ ਕੰਡਿਆਲੇ ਹੁੰਦੇ ਨੇਂ
ਛੋਟੀਆਂ-ਮੋਟੀਆਂ ਹਨੇਰੀਆਂ ਤੋਂ ਨਹੀਂ ਘਬਰਾਉਣਾਂ ਚਾਹੀਦਾ
ਐਸੀਆਂ ਵੀ ਮਿਸਾਲਾਂ ਨੇਂ ਜਿੰਨਾਂ ਨੇਂ ਤੂਫ਼ਾਨ ਵੀ ਟਾਲੇ ਹੁੰਦੇ ਨੇਂ
ਸਰਕਾਰੀ ਦੁਆਰਿਆਂ ਦੇ ਦਰ ਤਾਂ ਅਮੀਰਾਂ ਲਈ ਹੀ ਖੁੱਲਦੇ ਨੇਂ
ਗਰੀਬਾਂ-ਮਜਲੂਮਾਂ ਲਈ ਤਾਂ ਬਾਹਰ ਲਟਕਦੇ ਤਾਲੇ ਹੁੰਦੇ ਨੇਂ
" ਨਿਮਰ " ਜੇਹੜੇ ਕਹਿੰਦੇ ਸਾਡੇ ਬਿਨਾਂ ਇਹ ਜੱਗ ਚੱਲਣਾਂ ਨੀਂ ਕਦੇ
ਕਬਰਾਂ ਓਹਨਾਂ ਨਾਲ ਭਰ ਜਾਂਦੀਆਂ ਜਿੰਨਾਂ ਇਹ ਵਹਿਮ ਪਾਲੇ ਹੁੰਦੇ ਨੇਂ |
..................ਨਿਮਰਬੀਰ ਸਿੰਘ...................
