ਪੰਜਾਬੀ ਦੇ ਪ੍ਰਤੀਬੱਧ ਜਨਵਾਦੀ ਕਵੀ ਮੱਖਣ ਕੁਹਾੜ ਜੀ ਦੀ ਰਚਨਾ ਉਹਨਾ ਦੀ ਨਵੀਂ ਪੁਸਤਕ "ਕੇਤਕੀ ਦੇ ਫੁੱਲ" ਵਿੱਚੋਂ ਆਪ ਸਭ ਨਾਲ ਸਾਂਝਿਆਂ ਕਰਨ ਜਾ ਰਿਹਾ ਹਾਂ, ਉਮੀਦ ਹੈ ਪ੍ਰਵਾਨ ਕਰੋਗੇ...
ਤੇਰੀ ਬਾਣੀ ਦਾ ਹਰ ਅੱਖਰ ਹੈ ਬਾਬਾ ਮੋਤੀਆਂ ਵਾਂਗੂ |
ਅਸੀਂ ਬਾ-ਖੂਬੀ ਇਸ ਨੂੰ ਵਰਤ ਰਹੇ ਹਾਂ 'ਮੰਤਰਾਂ' ਵਾਂਗੂੰ |
ਤੁਸੀਂ ਦਿਵਾਨ ਲਾਕੇ ਯੁੱਧ ਨੂੰ ਪ੍ਰਚੰਡ ਕਰਦੇ ਸੀ,
ਰਵਾਇਤ ਕਾਇਮ ਹੈ ਸਾਡੀ ਵੀ ਗੁਰ ਜੀ ਸੌਰੀਆਂ ਵਾਂਗੂੰ |
ਨਹੀਂ ਡਰਨਾ, ਡਰਾਉਣਾ ਨਹੀਂ, ਪੁਰਾਣਾ ਫਲਸਫਾ ਹੋਇਆ,
ਤੇਰੇ ਅੱਜ ਸਿੱਖ ਗੁਰ ਜੀ ਵਿਚਰ ਰਹੇ ਨੇ 'ਰਾਜਿਆਂ' ਵਾਂਗੂੰ |
ਬੜੇ ਅਹੁਦੇ ਨੇ ਸਿੱਖਾਂ ਕੋਲ ਗੁਰ ਜੀ ਉੱਚਿਉਂ ਉੱਚੇ,
ਬੜੇ ਨੇ ਖਾਨਦਾਨੀ ਰਾਜ ਮੁਗਲੀ ਹਾਕਮਾਂ ਵਾਂਗੂੰ |
ਮਸਾਂ ਹੀ ਰਾਜ ਮਿਲਿਆ ਗੁਰ ਜੀ 'ਸਿੱਖ' ਨੂੰ ਤੇਰੀ ਕ੍ਰਿਪਾ ਨਾਲ,
ਮੁਖਲਾਫ ਜੇ ਤੁਰੂ ਕੁਚਲਾਂਗੇ ਉਸ ਨੂੰ ਲਖਪਤਾਂ ਵਾਂਗੂੰ |
ਅਸੀਂ ਹਾਂ ਨਿੰਮ ਦੇ ਪੱਤੇ, ਲਸਣ, ਗੁੱਗਲ, ਧਤੂਰਾ ਹਾਂ,
ਜਿਉਂਦੇ ਹਾਂ ਅਸੀਂ ਲੋਕਾਂ ਵਿੱਚ ਦੇਸੀ ਨੁਸਖਿਆਂ ਵਾਂਗੂੰ |
ਉਹ ਜਿਹੜੇ ਬਾਜ਼ ਚਿੜੀਆਂ ਤੋਂ ਬਣਾਏ ਸਨ ਗੁਰੂ ਜੀ ਨੇ,
ਉਹ ਚਿੜੀਆਂ ਨੋਚਦੇ ਨੇ ਖੂਬ ਅੱਜ ਕਲ੍ਹ ਸ਼ਿਕਰਿਆਂ ਵਾਂਗੂੰ |
ਤੇਰੇ 'ਲਾਲੋ' ਦੀ ਸੇਵਾ ਦਾ ਹੈ ਠੇਕਾ 'ਮਲਕ ਭਾਗੋ' ਕੋਲ,
ਤੇਰੇ 'ਭਜਨੀਕ' ਨਾਨਕ ਮੌਜ ਵਿੱਚ ਨੇ 'ਸੱਜਣਾ' ਵਾਂਗੂੰ |
ਖੁਮਾਰੀ ਨਾਮ ਦੀ ਨਾਨਕ ਨਹੀਂ ਦਿਨ ਰਾਤ ਰਹਿੰਦੀ ਹੁਣ,
ਅਫੀਮਾਂ, ਚਰਸ, ਪੋਸਤ, ਮਦ ਹੈ ਹੁਣ ਤਾਂ ਭਗਤੀਆਂ ਵਾਂਗੂੰ |
