ਮੈਂ ਨਾਨਕ ਹਾਂ,
ਨਹੀਂ ਹਾਂ ਗੁਰੂ ਨਾਨਕ |
ਕੁਲ ਤਾਰਕ ਨਹੀਂ,
ਹਾਂ ਜੱਗ ਤਾਰਕ........|
ਗਿਆ ਈ ਨਹੀਂ ਮੈਂ ਏਥੋਂ.......
ਟਕਰਾ ਰਿਹਾਂ ਬਾਬਰਾਂ ਨਾਲ,
ਮਲਕ ਭਾਗੋਆਂ ਜਿਹੇ ਜਾਬਰਾਂ ਨਾਲ .
ਲੜਿਆ ਹਾਂ,
ਵਹਿਮਾਂ ਦੇ ਨਾਲ |
ਜੂਝਿਆਂ,
ਭਰਮਾਂ ਦੇ ਨਾਲ |
ਲੋੜਾਂ ਦੇ ਨਾਲ,
ਦੁਸ਼ਵਾਰੀਆ ਦੇ ਨਾਲ |
ਤੰਗੀਆਂ ਦੇ ਨਾਲ,
ਖੁਆਰੀਆਂ ਦੇ ਨਾਲ |
ਪਟਾਖੇ ਤੇ ਮੋ-ਬਤੀਆਂ ਤੋਂ
ਕਦੇ ਵੀ ਡਰਿਆ ਨਹੀਂ |
ਗੁਰਦੁਆਰੇ,ਮੰਦਰਾ, ਮਸੀਤਾਂ
ਵੱਡੇ ਵੱਡੇ ਇਕਠਾਂ 'ਚ
ਕਦੇ ਵੀ ਵੜਿਆ ਨਹੀਂ |
ਗਿਆ ਹਾਂ ਹਮੇਸ਼ਾ
ਭਾਈ ਲਾਲੋਆਂ ਦੇ ਦੁੱਖ ਵੰਡੀ |
ਭਉਂਦਾ ਰਿਹਾਂ ਕੁਲੀਆਂ ਕੋਲ,
ਜਾਂ ਫਿਰ ਮਜਦੂਰ ਮੰਡੀ |
ਮੈਂ ਨਾਨਕ ਹਾਂ,
ਨਹੀਂ ਹਾਂ ਗੁਰੂ ਨਾਨਕ |
ਕੁਲ ਤਾਰਕ ਨਹੀਂ,
ਹਾਂ ਜੱਗ ਤਾਰਕ.......... |
|