ਕੁਝ ਨੂੰ ਬਾਦਲ ਚਾਹੀਦਾ
ਕੁਝ ਨੂੰ ਰਾਜੇ ਨਾਲ ਬੜਾ ਮੋਹ ਆਉਂਦਾ ਏ,
ਹਰ ਇੱਕ ਸ਼ਖਸ਼ ਆਪਣੇ ਲੀਡਰ ਨੂੰ ਵਡਿਆਉਣਾ ਚਾਹੁੰਦਾ ਏ,
ਬਾਦਲ ਦਾ ਟੁੱਟਿਆ ਚੂਲਾ
ਰਾਜੇ ਦਾ ਜੇਲ ਜਾ ਕੇ ਫ਼ੱਕਿਆ ਹੂਲਾ ਸਭ ਨੂੰ ਨਜ਼ਰ ਆਉਂਦਾ ਏ,
ਪਰ ਕਿਸੇ ਨੂੰ ਇੱਕ ਗਰੀਬ ਜੱਟ ਦੇ ਹੰਝੂ ਨਹੀਂ ਦਿਖਦੇ,
ਕਿਉਂ ?
ਕਿਉਂਕਿ ਹੰਝੂ ਅੱਜ ਕੱਲ ਦੇ ਕਮਰਸ਼ੀਅਲ ਯੁੱਗ ਵਿੱਚ ਕੋਈ ਖਾਸੇ ਮਹਿੰਗੇ ਨਹੀਂ ਵਿਕਦੇ,
ਹਾਂ ਵੈਸੇ ਜਦ ਓਹ ਹੀ ਜੱਟ ਖੁਦ੍ਕੁਸ਼ੀ ਕਰ ਲਵੇ,
ਆਪਣੇ ਹੀ ਖੇਤ ਦੀ ਕਿਸੇ ਟਾਹਲੀ ਬੇਰੀ ਯਾ ਕਿੱਕਰ ਨਾਲ ਖੁਦ ਨੂੰ ਟੰਗ ਲਏ,
ਤਾਂ ਸਭ ਨੂੰ ਓਹਦੇ ਟੱਬਰ ਦੀਆਂ ਇੰਝਾਂ ਦਿਖਦੀਆਂ ਨੇ,
ਭਲਾ ਕਿਉਂ?
ਕਿਉਂ ਦੇ ਰਾਜਨੀਤੀ ਦੇ ਬਾਜ਼ਾਰ ਵਿੱਚ ਲਾਸ਼ਾ ਬੜੀਆਂ ਹੀ ਮਹਿੰਗੀਆਂ ਵਿਕਦੀਆਂ ਨੇ,
ਵੈਸੇ ਬੜੀ ਅਜੀਬ ਚੀਜ਼ ਹੈ ਇਹ ਰਾਜਨੀਤੀ ,
ਕਿਤੇ ਕਿਸੇ ਲਾਲੂ ਨੇ ਕਬਜ਼ਾ ਕਰ ਲਿਆ
ਤੇ ਕਿਤੇ ਕਿਸੇ ਮਾਂ ਯਾ ਪਿਉ ਨੇ ਪੁੱਤ ਨੂੰ ਕੁਰਸੀ ਤੋਹਫ਼ੇ ਵਿੱਚ ਦੇ ਦਿੱਤੀ,
ਠੀਕ ਹੈ ਵੈਸੇ ਤਾਂ ਵਿਰਾਸਤ ਅੱਗੇ ਵਧਾਉਣੀ ਮਾੜੀ ਨਹੀਂ,
ਪਰ ਇਹ ਕੁਰਸੀ ਦੇ ਪਾਵੇ ਮਾੜੇ ਦੀ ਹਿੱਕ ਤੇ ਹੀ ਕਿਉਂ ਟਿਕਦੇ ਨੇ,
ਕਿਉਂ ਜੀਂਦਿਆਂ ਦੀ ਪਰਤੀਤ ਨਹੀਂ,
ਮਰਿਆਂ ਦੇ ਸੁਫ਼ਨੇ ਵਿਕਦੇ ਨੇ,
ਕੋਈ ਦੱਸ ਸਕਦਾ ਏ ਕਿਉਂ?
ਕਿਉਂਕਿ ਅਸੀਂ ਆਪਣੇ ਆਪ ਨੂੰ ਇਸ ਰੰਗ ਵਿੱਚ ਢਾਲ ਲਿਆ ਏ,
ਲੋਥਾਂ ਦੇ ਸ਼ਹਿਰ ਵਿੱਚ ਵਸਦੇ ਹਾਂ ਲਾਸ਼ ਬਣਕੇ ਸਭ ਨੇ ਜ਼ਮੀਰ ਆਪਣਾ ਮਾਰ ਲਿਆ ਏ,
ਓ ਭੋਲਿਓ ਗਾਂਧੀ ਦੇ ਬਾਂਦਰ ਨਹੀਂ
ਭਗਤ ਸਿੰਘ ਦੇ ਪੈਰੋਕਾਰ ਬਣੋ,
ਇੱਕ ਵਾਰ ਤਾਂ ਆਪਣੇ ਮਨ ਦੀ ਸੁਣਕੇ ਦੇਖ ਲਓ,
ਕਦੇ ਓਹਨਾਂ ਯੋਧਿਆਂ ਦੀ ਕੁਰਬਾਨੀ ਨੂੰ ਮੱਥਾ ਟੇਕ ਲਓ.,
ਮੈਨੂੰ ਨਾ ਹੀ ਕੋਈ ਕੁਰਬਾਨੀ ਨਾ ਬਗਾਵਤ ਹੀ ਚਾਹੀਦੀ ਏ,
ਮੈਨੂੰ ਤੇ ਇਨ੍ਸਾਨ ਦੇ ਦਿਲ ਵਿੱਚ ਇਨਸਾਨ ਲਈ ਮੁਹੱਬਤ ਚਾਹੀਦੀ ਏ,
ਜੇ ਹੋ ਸਕੇ ਤੇ ਏਨਾ ਕੁ ਹੀ ਕਰ ਦਿਓ ਕਾਫ਼ੀ ਏ,
ਬਾਕੀ ਕੁਝ ਜ਼ਿਆਦਾ ਮੂੰਹ ਖੋਲ ਗਿਆ ਤਾਂ ਉਸ ਲਈ "ਬਰਾੜ" ਮੰਗਦਾ ਮਾਫ਼ੀ ਏ,.
