|
ਮੈਂ ਖੋਜ ਖੋਜ ਹਾਰਿਆ, ਇਕੋ ਸੋਚ ਮਾਰਿਆ,
ਨਾ ਗੱਲ ਸੁਣ ਕੇ ਮੇਰੀ, ਮੇਰੇ 'ਤੇ ਹੱਸ ਦਿਓ....
ਕੀ ਸ਼ਹਿ ਮੁਹੱਬਤ ਹੈ, ਯਾਰੋ ਮੈਨੂੰ ਦੱਸ ਦਿਓ |
ਇਕ ਹੀਰ ਸਲੇਟੀ ਸੀ,
ਚੂਚਕ ਦੀ ਬੇਟੀ ਸੀ,
ਰਾਂਝੇ ਨੂੰ ਚਾਹੁੰਦੀ ਸੀ,
ਚੂਰੀਆਂ ਖੁਆਉਂਦੀ ਸੀ,
ਦੇਕੇ ਮਾਪਿਆਂ ਤਾਈਂ ਦਗਾ,
ਚੋਰੀ ਰਾਂਝੇ ਦੇ ਕੋਲ ਜਾ, ਪੱਟਾਂ ਤੇ ਸੌਣਾ ਉਲਫਤ ਹੈ.......
ਯਾਰੋ ਮੈਨੂੰ ਦੱਸ ਦਿਓ |
ਮਿਰਜ਼ਾ ਸੀ ਖਰਲਾਂ ਦਾ,
ਤੁਸੀਂ ਨਾਂ ਸੁਣਿਐਂ ਬੜਾ
ਘਰ ਨਾਨਕਿਆਂ ਦੇ ਜਾ,
ਸਾਰੇ ਨਾਤੇ ਦਿਲੋਂ ਭੁਲਾ,
ਸਹਿਬਾਂ ਨੂੰ ਨਾਲ ਭਜਾ,
ਸੌਣਾ ਜੰਡ ਦੇ ਥੱਲੇ ਆ, ਲਾਹਣਤ ਜਾਂ ਸ਼ਹੁਰਤ ਹੈ.......
ਯਾਰੋ ਮੈਨੂੰ ਦੱਸ ਦਿਓ |
ਫਰਿਹਾਦ ਨੇ ਸ਼ੀਰੀ ਲਈ,
ਪੁੱਟੀ ਦੁੱਧ ਦੀ ਇੱਕ ਨਦੀ,
ਹੁਣ ਨਦੀ ਉਹ ਕਿਧਰ ਗਈ,
ਕਿਹੜੇ ਰਸਤੇ ਜਾ ਪਈ,
ਇੱਕ ਤੇਸੇ ਨਾਲ ਨਦੀ,
ਬੰਦੇ ਨੇ ਪੁੱਟ ਲਈ, ਕੌਣ ਇਸ ਨਾਲ ਸਹਿਮਤ ਹੈ.........
ਯਾਰੋ ਮੈਨੂੰ ਦੱਸ ਦਿਓ |
ਇੱਕ ਸੁਣਿਐਂ ਸੋਹਣੀ ਸੀ,
ਮਾਹੀ ਨੂੰ ਮੋਹਣੀ ਸੀ,
ਛੱਡ ਖਸਮ ਤਾਈਂ ਸੁੱਤਾ,
ਰਾਤੀਂ ਕਰਦੀ ਪਾਰ ਝਨਾ,
ਰਿਸ਼ਤਾ ਪਤੀ-ਪਤਨੀ ਦਾ,
ਦੇਣਾ ਮਿੱਟੀ ਵਿੱਚ ਮਿਲਾ, ਕਿਥੋਂ ਦੀ ਲਿਆਕਤ ਹੈ.........
ਯਾਰੋ ਮੈਨੂੰ ਦੱਸ ਦਿਓ |
ਜੇ ਇਸ਼ਕ ਹੈ ਇਹ ਯਾਰੋ,
ਤਾਂ ਕੀ ਬਦਚਲਣੀ ਹੈ,
'ਇਕਬਾਲ' ਨੇ ਤੁਹਾਡੇ ਤੋਂ,
ਇਹੋ ਗੱਲ ਪੁੱਛਣੀ ਹੈ,
ਮੈਨੂੰ ਕੋਈ ਰਮਜ਼ ਨਹੀਂ,
ਬੇ-ਸਮਝ ਹਾਂ ਸਮਝ ਨਹੀਂ, ਦੱਸ ਦਿਓ ਤਾਂ ਰਹਿਮਤ ਹੈ.....
ਯਾਰੋ ਮੈਨੂੰ ਦੱਸ ਦਿਓ |
ਕੀ ਸ਼ਹਿ ਮੁਹੱਬਤ ਹੈ, ਯਾਰੋ ਮੈਨੂੰ ਦੱਸ ਦਿਓ |
**ਇਕਬਾਲ ਸਿੰਘ ਗਿੱਲ**
|
