|
ਅੱਜ ਦੇ ਹੀ ਦਿਨ, ਲਹਿਰਾਇਆ ਸੀ ਤਿੰਨ ਰੰਗਾ ਪਰਦਾ,
ਰੰਗ ਰਲ਼ੀਆਂ ਮਨਾਓ, ਕਿ ਅੱਜ ਆਜ਼ਾਦੀ ਦਾ ਦਿਨ ਹੈ |
ਅੱਜ ਦੇ ਹੀ ਦਿਨ, ਮਿਲਿਆ ਸੀ ਆਜ਼ਾਦੀ ਦਾ ਛੁਣਛੁਣਾ,
ਬੱਚੇ ਬਣ ਜਾਓ, ਕਿ ਅੱਜ ਆਜ਼ਾਦੀ ਦਾ ਦਿਨ ਹੈ |
ਅੱਜ ਦੇ ਹੀ ਦਿਨ, ਬਦਲੀ ਸੀ ਅੰਗਰੇਜ਼ ਨੇ ਕੁੰਜ,
ਫਿਰ ਡੰਗ ਖਾਓ, ਕਿ ਅੱਜ ਆਜ਼ਾਦੀ ਦਾ ਦਿਨ ਹੈ |
ਅੱਜ ਦੇ ਹੀ ਦਿਨ, ਲੱਗੀ ਸੀ ਧੋਤੀ ਟੋਪੀ ਨੂੰ ਪਿਆਸ,
ਆਪਣਾ ਖ਼ੂਨ ਪਿਲਾਓ, ਕਿ ਅੱਜ ਆਜ਼ਾਦੀ ਦਾ ਦਿਨ ਹੈ |
ਅੱਜ ਦੇ ਦਿਨ, ਅਸੀਂ ਤਾਂ ਜਲਾਵਾਂਗੇ ਸਿਵਾ ਵਾਅਦਿਆਂ ਦਾ,
ਤੁਸੀਂ ਮਹਿਫ਼ਲ ਸਜਾਓ, ਕਿ ਅੱਜ ਆਜ਼ਾਦੀ ਦਾ ਦਿਨ ਹੈ|
ਅੱਜ ਦੇ ਦਿਨ, ਦੇਖੇ ਸੀ ਅਸੀਂ ਜੋ ਸੁਨਹਿਰੇ ਸੁਪਨੇ,
ਫ਼ਿਰ ਚੇਤੇ ਚ ਲਿਆਓ, ਕਿ ਅਜੇ ਗੁਲਾਮੀ ਦਾ ਦਿਨ ਹੈ |
ਅੱਜ ਦੇ ਦਿਨ, ਜਿੱਥੇ ਮਰਨਗੇ ਭੁੱਖ ਤੇ ਬੀਮਾਰੀ ਨਾਲ਼ ਬੱਚੇ,
ਉਧਰ ਨਜ਼ਰ ਘੁਮਾਓ, ਕਿ ਅਜੇ ਗੁਲ਼ਾਮੀ ਦਾ ਦਿਨ ਹੈ |
ਅੱਜ ਦੇ ਦਿਨ, ਛੱਡ ਜਾਤਾਂ ਧਰਮਾਂ ਇਲਾਕਿਆਂ ਦੇ ਨਾਲ਼ੇ,
ਸਮੰਦਰ ਬਣ ਜਾਓ, ਕਿ ਅਜੇ ਗੁਲ਼ਾਮੀ ਦਾ ਦਿਨ ਹੈ |
ਅੱਜ ਦੇ ਦਿਨ, ਆਉਣ ਦਿਉ ਅੱਖਾਂ ਚ ਰੋਸ਼ਨੀ ਦੀ ਕਿਰਨ,
ਇਹ ਪਰਦਾ ਉਠਾਓ, ਕਿ ਅਜੇ ਗੁਲ਼ਾਮੀ ਦਾ ਦਿਨ ਹੈ |
ਅੱਜ ਦੇ ਦਿਨ, ਦੇ ਦਿਓ ਭੁੱਬਲ ਨੂੰ ਭਾਂਬੜ ਦਾ ਰੂਪ,
'ਗੀਤ' ਆਜ਼ਾਦੀ ਦੇ ਗਾਓ, ਕਿ ਅਜੇ ਗੁਲ਼ਾਮੀ ਦਾ ਦਿਨ ਹੈ |
*Amrit Barnala*
|
