ਤਾਣਾ ਕੀਂਕਣ ਬਦਲੇ,ਤੰਦ ਬਦਲਦੇ ਨਈਂ
ਰੋਗੀ ਸਰਕਾਰਾਂ ਦੇ ਢੰਗ ਬਦਲਦੇ ਨਈਂ
ਕਲ ਦੇ ਰਾਜੇ ਹੀ ਅਜ ਭੇਸ ਵਜ਼ੀਰਾਂ ਦੇ
ਗਿੱਝੇ ਬਘਿਆੜਾਂ ਦਾ ਦੰਦ ਬਦਲਦੇ ਨਈਂ
ਕੁਰਸੀ ਲਈ ਹੀ ਦਲ-ਬਦਲੀ ਦਾ ਰੌਲ੍ਹਾ ਸੀ
ਕੁੰਜ ਬਦਲ ਲੈਣੇ ਤੋਂ ਡੰਗ ਬਦਲਦੇ ਨਈਂ
ਨੌਕਰੀਆਂ , ਖੁਸ਼ਹਾਲੀ,ਅਮਨਾਂ ਦੇ ਨਾਅਰੇ
ਓਹੀ ਗੀਤ ਪੁਰਾਣੇ ਛੰਦ ਬਦਲਦੇ ਨਈਂ
ਰਿਸ਼ਵਤਖੋਰੀ,ਦੰਗੇ ਸਭ ਦੀ ਖਸਲਤ ਹੁਣ
ਜੋ ਵੀ ਆਣ ਚੜਾਏ ਚੰਦ ਬਦਲਦੇ ਨਈਂ
ਹਾਸੀਂ ਪੈਂਦੀ ਗਲ ਹਰ ਜੋ ਅਨੁਸ਼ਾਸਨ ਦੀ
ਜਨਤਾ ਨਾਲ ਮਖੌਲਾਂ, ਭੰਡ ਬਦਲਦੇ ਨਈਂ
ਸੰਸਦ-ਘਰ ਦੇ ਸੈਦੇ ਲੁਟ ਹੀਰਾਂ ਲੈ ਗਏ
ਰਾਂਝਣ ਪੱਲੇ ਮੱਝੀਂ, ਝੰਗ ਬਦਲਦੇ ਨਈਂ
ਮਹਲ-ਮੁਨਾਰੀਂ ਲਗ ਗਈ ਸਾਰੀ ਖੁਸ਼ਹਾਲੀ
ਢਾਰੇ-ਝੁਗੀਆਂ ਦੇ ਪਰ ਰੰਗ ਬਦਲਦੇ ਨਈਂ
ਇਕੋ ਤੂੰ ਸਭਨਾਂ ਦਾ ਤਾਂ ਵੰਡ ਕਾਣੀ ਕਿਉਂ
ਅਦਭੁਤ ਤੇਰੇ ,ਮੌਲਾ,ਤੰਜ਼ ਬਦਲਦੇ ਨਈਂ
ਵਖਰੀ ਤੋਰ ਜ਼ਮਾਨੇ ਦੀ ਵੀ ਜ਼ਾਹਿਰ ਹੈ
ਰੂੜੀਵਾਦੀ ਸੋਚ ਦੇ ਢੰਗ ਬਦਲਦੇ ਨਈਂ
ਬਦਮਾਸ਼ਾਂ ਦੇ ਨਾਲ ਕਚਿਹਰੀ ਵਣਜ ਸਦਾ
ਚੋਰ ਤੇ ਕੁੱਤਾ ਇੱਕੋ ਸੰਗ ਬਦਲਦੇ ਨਈਂ
ਮਿਰਜ਼ਾ,ਸਾਹਿਬਾਂ ਅਜ ਦੇ, ਰੀਤਾਂ ਰੂੜ ਦੀਆਂ
ਇਸ਼ਕੇ ਜਾਨ ਗਵਾਉਂਦੇ,ਜੰਡ ਬਦਲਦੇ ਨਈਂ
|