ਫਬਦੀ ਹੈ ਨਾ ਹੁਣ, ਹੁਸਨ -ਓ- ਸ਼ਬਾਬ ਦੀ ਗੱਲ।
ਕਲਮਾਂ ਵਾਲਿਓ ਕਰੋ, ਬਲਦੇ ਪੰਜਾਬ ਦੀ ਗੱਲ।
ਲਿਖਤਾਂ ਤੁਹਾਡੀਆਂ ਨੇ ਬਣਨਾ ਇਤਿਹਾਸ ਦੇ ਪੰਨੇ,
ਪਰੀਤ ਵਿਚਾਰੋ ਡੁੱਲੇ ਹੋਏ, ਖੂਨ ਦੇ ਹਿਸਾਬ ਦੀ ਗੱਲ।
20ਜਨਵਰੀ, 1993
ਮੋਢੇ ਨਾਲ ਜੋੜ ਮੋਢਾ, ਦੇਸ਼ ਨੂੰ ਉਸਾਰੀਏ ਪਰੀਤ।
ਜਾਤ-ਪਾਤ ਨੂੰ ਮੁਕਾਕੇ, ਸਭ ਨੂੰ ਪਿਆਰੀਏ ਪਰੀਤ।
ਰੰਗ -ਨਸਲ ਦਾ ਕੱਢਕ, ਦਿਲਾਂ ਦੇ ਵਿਚੋਂ ਪਾੜਾ,
ਮਹਿਕ ਏਕਤਾ ਦੀ, ਚਹੁੰ ਪਾਸੀਂ ਖਿਲਾਰੀਏ ਪਰੀਤ।
23 ਜਨਵਰੀ, 1993
ਕਿਸੇ ਦੀ ਭਾਵਨਾ ਦਾ, ਕਰਦਾ ਕੌਣ ਹੈ ਖ਼ਿਆਲ ਏਥੇ।
ਸਭਨੂੰ ਮਤਲਬ ਹੈ ਆਪਣੇ ਹੀ ਮੁਫਾਦਾਂ ਨਾਲ ਏਥੇ।
ਸੋਚ ਇਨਸਾਨ ਦੀ ਹੋ ਗਈ ਖੁਦ ਤਾਈਂ ਮਹਿਦੂਦ ਬੱਸ,
ਹਕਾਰਤ ਦਾ ਖਿਲਾਰਾ ਪਰੀਤ ਉਲਫ਼ਤ ਦਾ ਕਾਲ ਏਥੇ।
15 ਫਰਵਰੀ, 1993
ਇਹ ਕੀ ਵਰਤ ਗਿਆ ਹੈ ਕਹਿਰ ਭਲਾਂ?
ਲਹੂ 'ਚ ਡੁੱਬਿਆ ਕਿਉਂ ਹਰ ਸ਼ਹਿਰ ਭਲਾਂ?
ਭਾਈ ਭਾਈ ਦਾ ਵੈਰੀ ਹੋਇਆ ਪਿਆਰ ਭੁਲਾਕੇ,
ਕਿਸ ਘੋਲਿਆ ਹਵਾ 'ਚ ਜ਼ਹਿਰ ਭਲਾਂ।
|