ਹਰ ਗੁਜ਼ਰਦੇ ਪਲ ਨੂੰ ਰਹਿੰਦੈ ਇੰਤਜ਼ਾਰ ਤੇਰੀ ਮੁਲਾਕਾਤ ਦਾ,
ਚੰਨ ਤਾਰਿਆਂ ਨਾਲ ਸਿੰਗਾਰੀ ਹੋਈ ਵਸਲਾਂ ਦੀ ਰਾਤ ਦਾ
ਹੰਝੂ,ਪੀੜਾਂ, ਚੀਸਾਂ ਤੇ ਤਨਹਾਈਆਂ ਮੁੱਕੀਆਂ ਨਹੀਂ ਅਜੇ ਮਹਿਰਮਾ,
ਇੱਕ ਵੱਡਾ ਹਿੱਸਾ ਬਾਕੀ ਏ ਅਜੇ ਸੱਜਣਾ ਤੇਰੀ ਖੈਰਾਤ ਦਾ
ਬੜੇ ਦਿਲ ਵਿਛਦੇ ਨੇ ਰਾਵਾਂ ਵਿੱਚ ਇੱਕ ਤੇਰਾ ਹੀ ਨਾ ਜਿੱਤ ਸਕੇ,
ਹੁਣ ਹਰ ਪਲ ਜਸ਼ਨ ਮਨਾਈਏ ਅਸੀਂ ਤੇਰੇ ਹੱਥੋਂ ਖਾਦੀ ਮਾਤ ਦਾ
ਖਵਰੇ ਬੰਜਰ ਦਿਲ ਤੇਰਾ ਕਦੀ ਖਿੜ ਜਾਵੇ ਕਿਸੇ ਫੁੱਲ ਵਾਂਗਰ,
ਖਵਰੇ ਕਦੋਂ ਰੁਖ ਬਦਲ ਜਾਵੇ ਇਸ ਜ਼ਿੰਦਗੀ ਦੀ ਬਿਸਾਤ ਦਾ
ਤੇਰੇ ਹੀ ਵਿਹੜੇ ਜਾ ਬਹਿੰਦੀ ਏ ਰੂਹ ਤੇ ਚੰਦਰੀ ਸੋਚ ਮੇਰੀ,
ਨਾ ਥਕਦਾ ਏ ਨਾ ਰੁਕਦਾ ਏ ਕਾਫਲਾ ਮੇਰੇ ਖਯਾਲਾਤ ਦਾ
ਮਹਿਕਦੀ ਸੀ ਏ ਜ਼ਿੰਦਗੀ ਤੇਰੇ ਹਾਸਿਆਂ ਦੀ ਖੁਸ਼ਬੂ ਸਦਕਾ,
ਬਨਣਾ ਸੀ ਤਾਂ ਖੁਸ਼ੀ ਬਣਦਾ ਕਿਉਂ ਬਣ ਗਿਆਂ ਦਰਦ ਹਯਾਤ ਦਾ
ਜੀਨੂੰ ਵੇਖਕੇ ਜੁਗਨੂੰ ਬਣ ਜਾਂਦੇ ਸੀ ਨੈਣ ਮੇਰੇ ਅਨਭੋਲ ਜਿਹੇ,
ਕੀ ਪਤਾ ਸੀ ਉਨੇ ਸਬਬ ਬਨਣੈ ਨਾ ਮੁਕਦੀ ਇਸ ਬਰਸਾਤ ਦਾ
|