ਤੇਰੀ ਘਾਟ ਨਈਂਓਂ ਮਾਏ ਪੂਰੀ ਹੋਣੀ,
ਗਾਉਣ ਵਾਲੇ ਆਉਂਦੇ ਰਹਿਣਗੇ,
ਚੰਨ ਅੰਬਰਾਂ ਤੇ ਇੱਕ ਬੱਸ ਤੂੰ ਐਂ,
ਤਾਰੇ ਲੱਖਾਂ ਈ ਟਿਮਟਿਮਾਉਂਦੇ ਰਹਿਣਗੇ
ਵਿਰਸਾ ਪੰਜਾਬੀ ਤੂੰ ਹੀ ਸਾਂਭਿਆ ਸੀ ਮਾਏ
ਲੋਕ ਗੀਤਾਂ ਦਾ ਦੌਰ, ਅਰੰਭਿਆ ਸੀ ਮਾਏ,
ਤੇਰੇ ਜਿਹਾ ਨਈਂਓਂ ਮਾਏ ਕਿਸੇ ਗਾਉਣਾ,
ਰਾਟ ਲੋਕ ਪਾਉਂਦੇ ਰਹਿਣਗੇ,
ਤੇਰੀ ਘਾਟ ਨਈਂਓਂ ਮਾਏ ਪੂਰੀ ਹੋਣੀ,
ਗਾਉਣ ਵਾਲੇ ਆਉਂਦੇ ਰਹਿਣਗੇ |
ਜਦ ਗੀਤ ਕਿਤੇ ਸ਼ਗਨਾਂ ਦੇ ਗਾਏ ਜਾਣਗੇ,
ਪੈਰ ਤੇਰੇ ਦੱਸੇ ਰਾਹ ਤੇ ਹੀ ਪਾਏ ਜਾਣਗੇ,
ਤੂੰ ਪੰਜਾਬ ਦੀ ਕੋਇਲ ਅਖਵਾਈ,
ਲੋਕ ਕਾਵਾਂ ਰੌਲੀ ਪਾਉਂਦੇ ਰਹਿਣਗੇ,
ਤੇਰੀ ਘਾਟ ਨਈਂਓਂ ਮਾਏ ਪੂਰੀ ਹੋਣੀ,
ਗਾਉਣ ਵਾਲੇ ਆਉਂਦੇ ਰਹਿਣਗੇ |
ਤੇਰੇ ਬਾਝ ਮਾਏ ਪੰਜਾਬ, ਹੋ ਗਿਆ ਯਤੀਮ ਏ,
ਤੇਰੇ ਨਾਲ ਪਿਆਰ ਸਾਨੂੰ, ਧੁਰੋਂ ਮੁੱਢ ਕਦੀਮ ਏ,
ਤੇਰੇ ਗੀਤ ਮਾਏ ਮਹਿਕ ਪੰਜਾਬ ਦੀ,
ਸਦਾ ਹੀ ਖਿੰਡਾਉਂਦੇ ਰਹਿਣਗੇ,
ਤੇਰੀ ਘਾਟ ਨਈਂਓਂ, ਮਾਏ ਪੂਰੀ ਹੋਣੀ,
ਗਾਉਣ ਵਾਲੇ ਆਉਂਦੇ ਰਹਿਣਗੇ |
ਮੇਰੀ ਕੀ ਔਕਾਤ ਤੇਰੇ, ਗੀਤਾਂ ਦਾ ਬਖਾਨ ਕਰਾਂ,
ਮੈਂ ਤਾਂ ਬੱਸ ਸੱਚ ਨੂੰ, ਗੀਤਾਂ 'ਚ ਬਿਆਨ ਕਰਾਂ,
ਯਾਦ ਰੱਖਣਾ ਮੌਸੀਕੀ ਦੇ ਵਾਰਿਸੋ,
ਐਸੇ ਫਨਕਾਰ ਨਾ ਆਉਂਦੇ ਰਹਿਣਗੇ,
ਤੇਰੀ ਘਾਟ ਨਈਂਓਂ, ਮਾਏ ਪੂਰੀ ਹੋਣੀ,
ਗਾਉਣ ਵਾਲੇ ਆਉਂਦੇ ਰਹਿਣਗੇ |
ਤੇਰੀ ਘਾਟ ਨਈਂਓਂ, ਮਾਏ ਪੂਰੀ ਹੋਣੀ,
ਗਾਉਣ ਵਾਲੇ ਆਉਂਦੇ ਰਹਿਣਗੇ.....
|