ਕੀ ਲਿਖਾਂ ਕਿਵੇਂ ਬਿਆਨ ਕਰਾਂ ਕਿ, ਜਦੋਂ ਤੋਂ ਬਣ ਤੂੰ ਮੇਰੀ ਮੀਤ ਗਈ |
ਜੇਠ ਹਾੜ ਦੀ ਤੱਪਦੀ ਲੂ ਵੀ, ਬਣ ਹਵਾ ਪਹਾੜਾਂ ਦੀ ਠੰਢੀ ਸ਼ੀਤ ਗਈ |

ਸ਼ੁਹਬਤ ਜਦ ਮੈਂ ਤੇਰੀ ਆ ਬੈਠਾਂ, ਕਾਇਨਾਤ ਲੱਗੇ ਜਲਤਰੰਗ ਛੋਂਹਦੀ ,
ਇਕਲਾਪੇ ਦੀ ਵੀਣਾ ਸੁਣਾਉਣ ਵਾਲ਼ੀ, ਜੋ ਸਦੀ ਸੀ ਲੱਗਦਾ ਬੀਤ ਗਈ |

ਜਾਮ ਛਲਕਾਵਾਂ ਚੰਨ ਸੂਰਜ ਨਾਲ਼, ਸਾਥ ਰੋਜ਼ ਕਰਾਂ ਮੈਂ ਜੁਗਨੂੰਆਂ ਦਾ ,
ਰਾਤਾਂ ਹਨੇਰੀਆਂ ਦੀ ਬਾਤ ਪਾਉਣੀ, ਹੁਣ ਤਾਂ ਕਦ ਦੀ ਹੋ ਅਤੀਤ ਗਈ |

ਗੱਲਾਂ ਸੁਣ ਕੇ ਮੇਰੇ ਦਿਲ ਵਾਲ਼ੀਆਂ, ਰੁੱਖ ਵੀ ਨੇ ਅੱਜਕੱਲ ਥੱਕ ਜਾਂਦੇ ,
ਜਿਸ ਦਿਨ ਤੋਂ ਚੁੱਪ ਦੇ ਬੁੱਤ ਉੱਤੇ, ਤੇਰੇ ਪਿਆਰ ਦੀ ਉਕਰ ਲੀਕ ਗਈ |

ਕੋਈ ਸਮਾਂ ਸੀ ਪੈਰੀਂ ਲੱਗੀ ਠੋਕਰ ਵੀ, ਦੁਖਦੀ ਸੀ ਕਈ ਦਿਨ ਲੰਘ ਮੈਨੂੰ ,
ਹੁਣ ਤੇਰੀ ਅੱਖ 'ਚ ਪੈਂਦੀ ਰੜਕ ਚੰਨੋ, ਬਣ ਮੇਰੇ ਦਿਲ ਦੀ ਟੀਸ ਗਈ |

ਆਇਆ ਚੱਲ ਕੇ ਜਿਹਨਾਂ ਪੈਰਾਂ ਤੇ, ਕਲਾਵੇ ਵਿੱਚ ਤੂੰ ਮੈਨੂੰ ਲੈਣ ਲਈ ,
ਚੁੰਮਣਾ ਪੈਰਾਂ ਦੇ ਹਰ ਨਿਸ਼ਾਨ ਤੇਰੇ ਨੂੰ, ਬਣ ਮੇਰੀ ਹੁਣ ਇਹ ਰੀਤ ਗਈ |

ਔਕਾਤ ਕੀ ਸ਼ਬਦਾਂ ਦਾ ਜਾਲ ਬੁਣ, ਮੇਰੀ ਕਵਿਤਾ ਗੁਣਗੁਨਾਉਣ ਦੀ ,
ਇਹ ਤਾਂ ਪਿਆਰ ਤੇਰੇ ਦੀ ਧੁਨ, ਜੋ ਮੇਰੇ ਬੁੱਲਾਂ ਤੇ ਆ ਬਣ ਗੀਤ ਗਈ
*Dr.Amrit Barnala*

nice words...