ਸ਼ਹੀਦ ਏ ਆਜ਼ਮ ਭਗਤ ਸਿੰਘ ਦੇ ਜਨਮ ਦਿਨ ਨੂੰ ਸਮਰਪਿਤ। ਸਾਥੀਓ ਭਗਤ ਸਿੰਘ
ਹੀ ਅਜਾਦੀ ਦੀ ਲੜਾਈ ਦਾ ਅਜਿਹਾ ਮਹਾਂਨਾਇਕ ਸੀ ਜੋ ਇਹ ਸਮਝ ਗਿਆ ਸੀ ਕਿ
ਅੰਗਰੇਜਾਂ ਤੋਂ ਬਾਅਦ ਅਜਾਦੀ ਸਿਰਫ ਮੁੱਠੀ ਭਰ ਸਰਮਾਏਦਾਰਾਂ ਨੂੰ ਹੀ ਮਿਲੇਗੀ ਤੇ ਸਾਨੂੰ
ਆਮ ਲੋਕਾਂ ਦੀ ਅਜਾਦੀ ਲਈ ਹੋਰ ਸੌ ਸਾਲ ਲੜਨਾ ਪਵੇਗਾ। ਆਓ ਸਾਥੀਓ ਭਗਤ ਸਿੰਘ
ਦੇ ਅਧੂਰੇ ਸੁਪਨੇ ਨੂੰ ਪੂਰਾ ਕਰਨ ਦਾ ਪ੍ਰਣ ਕਰੀਏ। ਸੁਚੇਤ ਹੋਈਏ ਤੇ ਪੂੰਜੀਵਾਦੀ ਸਫਾਂ ਦੇ
ਖਿਲਾਫ ਹਰ ਮੁਹਾਜ ਤੇ ਮੋਰਚੇ ਲਾਈਏ।

ਝਾਂਜਰ ਮਿੱਤਰਾਂ ਦੇ ਦਰ ‘ਤੇ ਹੀ ਛਣਕਾ ਕੇ ਆਏ ਹਾਂ ।
ਸਾਹਵੇਂ ਦੁਸ਼ਮਣਾ ਦੇ ਤਾਂ ਬੱਕਰੇ ਬੁਲਾ ਕੇ ਆਏ ਹਾਂ ।

ਗੁੜ ਦੀ ਰੋੜੀ ਜਿਹਾ ਨਹੀਂ ਵਜੂਦ ਸਾਡਾ,ਪਿੱਪਲ ਹਾਂ ,
ਪੱਥਰਾਂ ਵਿੱਚੋਂ ਵੀ ਆਪਣਾ ਆਪ ਉਗਾ ਕੇ ਆਏ ਹਾਂ ।

ਮੋਢਾ ਦੇਣ ਵਾਲੇ ਚਾਰ ਬੰਦਿਆਂ ਦੀ ਨਾਂ ਪਰਵਾਹ ਸਾਨੰ,
ਕਲਮ ਨੂੰ ਸੱਚ ਦੀਆਂ ਰਗਾਂ ਉੱਤੇ ਟਿਕਾ ਕੇ ਆਏ ਹਾਂ ।

ਗਾਂਧੀ ਦਾ ਸੱਚ ਵੀ ਕਿੱਡਾ ਕੁ ਸੱਚ ਹੈ,ਪਰਖ ਲਵਾਂਗੇ ,
ਸੋਚ ਨੂੰ ਤਰਕ ਦੀ ਸਾਣ ਉੱਤੇ ਘਸਾ ਕੇ ਆਏ ਹਾਂ ।

ਜ਼ਿੱਲਤ,ਗੁਲਾਮੀ ਦੀ ਜ਼ਿੰਦਗੀ ਨਾ ਮਨਜੂਰ ਅਸਾਂ ਨੂੰ,
ਗਲ਼ ਲਾ ਮੌਤ,ਰਾਹ ਜ਼ਿੰਦਗੀ ਦਾ ਰੁਸ਼ਨਾ ਕੇ ਆਏ ਹਾਂ ।

ਕੈਦ ਅਸੀਂ ਸੀ ਜਾਂ ਹਕੂਮਤ, ਵਕਤ ਤੋਂ ਪੁੱਛ ਲੈਣਾ ,
ਜੇਲੋਂ ਰੌਸ਼ਨੀ ਦਾ ਪੈਗਾਮ ਹਰ ਘਰ ਪਹੁੰਚਾ ਕੇ ਆਏ ਹਾਂ।

ਸਾਨੂੰ ਆਸਤਕ ਸਿੱਧ ਕਰਨ ਦੀ ਕੋਸ਼ਿਸ ਨਾ ਕਰਿਓ ,
ਅਸੀਂ ਤਾਂ ਰੱਬ ਦੀ ਹੋਂਦ ਦੇ ਭਰਮ ਵੀ ਮਿਟਾ ਕੇ ਆਏ ਹਾਂ।

ਮਨਜੀਤ ਕੋਟੜਾ ।