|
ਗ਼ਜ਼ਲ--- ਬਥੇਰੇ ਯਾਰ ਨੇ ਮੇਰੇ ....... |
ਕਮਿਊਨਿਟੀ ਦੇ ਸਾਰੇ ਮੈਂਬਰਾਂ / ਦੋਸਤਾਂ ਨੂੰ ਸਾਹਿਤਕ ਸਲਾਮ / ਇੱਕ ਨਵੀਂ ਗ਼ਜ਼ਲ ਤੁਹਾਡੇ ਰੂਬਰੂ ਕਰ ਰਿਹਾ ਹਾਂ , ਹਾਜ਼ਰੀ ਕਬੂਲ ਕਰਨਾ ਜੀ / ਮੈਨੂੰ ਤੁਹਾਡੇ ਕੀਮਤੀ ਸੁਝਾਵਾਂ ਦੀ ਉਡੀਕ ਰਹੇਗੀ ਼
ਗ਼ਜ਼ਲ
ਉਨੂੰ ਮਿਲਣਾ ਝਨਾਂ ਤੋਂ ਪਾਰ ਜਾ ਕੇ ਸੀ , ਨਹੀਂ ਮਿਲਿਆ ਰਿਹਾਂ ਮੰਝਧਾਰ ਵਿਚ ਫਸਿਆ, ਕਿਨਾਰਾ ਹੀ ਨਹੀਂ ਮਿਲਿਆ
ਮਨਾਂ ਤੇ ਬੋਝ, ਖਾਲੀਪਨ , ਉਦਾਸੀ ਚਿਹਰਿਆਂ ਉੱਤੇ, ਜੋ ਵੀ ਮਿਲਿਆ , ਬਿਨਾਂ ਇਸ ਤੋਂ, ਕਦੇ ਕੋਈ ਨਹੀਂ ਮਿਲਿਆ
ਮੈਂ ਇਹ ਤਾਂ ਕਹਿ ਨਹੀਂ ਸਕਦਾ, ਕਿਸੇ ਤੋਂ ਪਿਆਰ ਮਿਲਿਆ ਨਈਂ, ਮਗਰ ਮੈਨੂੰ , ਜਦੋਂ ਇਸਦੀ , ਜ਼ਰੂਰਤ ਸੀ , ਨਹੀਂ ਮਿਲਿਆ
ਜੁਦਾਈ, ਬੇਬਸੀ, ਗ਼ਮ, ਦਰਦ , ਧੋਖਾ , ਬੇਰੁਖੀ ਯਾਰੋ , ਤੁਸੀਂ ਸਭ ਕੁਝ ਬੜਾ ਦਿਤੈ , ਤੁਹਾਥੋਂ ਕੀ ਨਹੀਂ ਮਿਲਿਆ
ਬਥੇਰੇ ਯਾਰ ਨੇ ਮੇਰੇ , ਬੜੇ ਗ਼ਮਖ਼ਾਰ ਨੇ ਮੇਰੇ , ਮਗਰ ਸੀ ਆਰਜ਼ੂ ਜਿਸਦੀ , ਉਹ ਹਾਲੇ ਵੀ ਨਹੀਂ ਮਿਲਿਆ
ਉਡਾਰੀ ਮਾਰ ਕੇ ਕਾਰੂੰ, ਸਿਕੰਦਰ ਛਿਪ ਗਿਆ ਕਿੱਥੇ , ਖ਼ਜ਼ਾਨਾ ਕੀ , ਉਦਾ ਘਰ ਜਿਸ ਗਲੀ ਵਿਚ ਸੀ, ਨਹੀਂ ਮਿਲਿਆ
ਰਿਹਾ ਮਸਰੂਫ਼ 'ਮਹਿਰਮ' ਪੀਣ ਵਿਚ ਜਾਂ ਹੋਰ ਕੰਮਾਂ ਵਿਚ, ਮੇਰੀ ਮਹਿਫ਼ਿਲ 'ਚ ਆ ਕੇ ਵੀ, ਉਹ ਮੈਨੂੰ ਹੀ ਨਹੀਂ ਮਿਲਿਆ ========================= ਜਸਵਿੰਦਰ ਮਹਿਰਮ
|
|
24 Nov 2009
|