ਸਤਿ ਸ਼ੀ੍ ਅਕਾਲ ਅਤੇ ਨਵੇਂ ਸਾਲ ਦੀਆਂ ਮੁਬਾਰਕਾਂ ਜੀ ਸਾਰਿਆਂ ਨੂੰ...
ਨਵੇਂ ਸਾਲ ਬਾਰੇ ਲਿਖਣ ਦਾ ਸਬੱਬ ਬਣਿਆ ਤੇ ਤੁਹਾਡੇ ਨਾਲ ਸਾਂਝਾ ਕਰ ਰਿਹਾ ਹਾਂ ਉਮੀਦ ਹੈ ਪਸੰਦ ਕਰੋਗੇ....
ਕੁੱਝ ਨਵੇਂ ਸਾਲ ਦੀਆਂ ਰੀਝਾਂ ਨੂੰ ਅਸੀਂ ਚਾਵਾਂ ਨਾਲ ਸਜਾਵਾਂਗੇ...
ਤੇਰੇ ਦਰ ਤੇ ਸੱਜਣਾ ਕਰ ਸਿਜਦਾ ਅਸੀਂ ਤਲੀਏਂ ਦੀਪ ਜਗਾਵਾਂਗੇ...
ਅਸੀਂ ਤੇਰੇ ਵਾਂਗੂੰ ਚੰਨ ਦੇ ਉੱਤੇ ਜਾਣ ਦਾ ਵਾਅਦਾ ਕਰਨਾ ਨਹੀਂ...
ਜੇ ਹੋ ਸਕਿਆ ਕਿਸੇ ਭੁੱਖੇ ਦੇ ਮੂੰਹ ਅੰਨ ਦਾ ਟੁਕੜਾ ਪਾਵਾਂਗੇ...
ਕੁੱਝ ਆਪਣੀ ਸ਼ਾਨ ਵਧਾਉਣ ਲਈ ਹਾਂ ਤਾਜ ਤਾਂ ਬਣਨਾ ਔਖਾ ਏ...
ਕਿਸੇ ਸੁੱਕੇ ਰੁੱਖੇ ਫਟੇ ਹੋਏ ਪੈਰਾਂ ਵਿੱਚ ਜੁੱਤੀ ਪਾਵਾਂਗੇ....
ਹੈ ਸ਼ੋਰ ਸ਼ਰਾਬਾ ਭੀੜ ਬੜੀ ਅੱਖਾਂ ਤੇ ਪੱਟੀ ਹੈ ਸਭਦੇ...
ਉਮੀਦ ਹੈ ਸਭਨੇ ਸੁਣਨਾ ਨਹੀਂ ਪਰ ਕਈਆਂ ਦੀ ਪੱਟੀ ਲਾਹਵਾਂਗੇ...
ਕਿਉਂ ਅੰਨੇਵਾਹ ਨੇ ਹੋ ਲੋਕੀਂ ਜਾ ਚਰਣਾਂ ਦੇ ਵਿੱਚ ਗਿਰ ਜਾਂਦੇ...
ਇਹ ਆਪੂੰ ਬਣਿਆਂ ਬਾਬਿਆਂ ਤੋਂ ਕਈਆਂ ਦੀ ਕੈਦ ਛੁਡਾਵਾਂਗੇ...
ਕੁੱਖਾਂ ਦੇ ਕਾਤਿਲ ਨੇ ਜਿਹੜੇ ਇਹ ਸ਼ਰੇਆਮ ਆਜਾਦ ਫਿਰਨ...
ਅਸੀਂ ਇਹੇ ਆਜਾਦੀ ਨਹੀ ਲੈਣੀ ਇਹਨਾਂ ਨੂੰ ਸਬਕ ਸਿਖਾਵਾਂਗੇ...
ਤੂੰ ਲੱਗਦੇ ਹੱਥ ਲੈ ਸੁਣ ਸੱਜਣਾ ਇਹ ਸਮੇਂ ਦੀਆਂ ਸਰਕਾਰਾਂ ਦੀ...
ਦਾਅ ਲੱਗਦਾ ਲਾਈ ਢਾਹ ਜਾਂਦੇ ਹੁਣ ਤਖਤ ਇਹਨਾਂ ਦੇ ਢਾਹਵਾਂਗੇ...
ਹੈ ਗੋਲੀ ਚੱਲਦੀ ਦੂਰ ਕਿਤੇ ਪੰਜਾਬ ਮੇਰਾ ਕਿਉਂ ਸੜਦਾ ਏ...
ਇਹ ਰਾਜਨੀਤੀ ਦਿਆਂ ਚੌਧਰੀਆਂ ਦੇ ਪਿੰਡੇ ਅੱਗਾਂ ਲਾਵਾਂਗੇ...
ਇਹ ਨਵੇਂ ਸਾਲ ਨੇ ਆਉਣਾ ਏ ਤਾਰੀਖ ਸਮਾਂ ਬਣ ਲੰਘ ਜਾਣਾ...
ਕਰ ਵਾਅਦਾ ਚੰਗੀ ਸੋਚ ਬਣਾ ਇਤਿਹਾਸ ਕੋਈ ਨਵਾਂ ਬਣਾਵਾਂਗੇ...
ਅਸੀਂ ਜਿੰਨੇ ਜੋਗੇ ਹਾਂ ਸੱਜਣਾ ਉਦੂੰ ਵੱਧ ਕੋਸ਼ਿਸ਼ ਕਰਨੀ ਐ...
ਜੇ ਤੂੰ ਮੇਰੇ ਆ ਨਾਲ ਖੜੇਂ ਛਵੀਆਂ ਦੇ ਰੁਖ ਬਦਲਾਵਾਂਗੇ...
ਅਸੀਂ ਰਾਹੀ ਨਵੀਆਂ ਰਾਹਾਂ ਦੇ ਕੋਈ ਨਵੀਆਂ ਪੈੜਾਂ ਪਾਵਾਂਗੇ...
ਇਹ ਦੁਨੀਆਂ ਖੜ ਖੜ ਦੇਖੂਗੀ ਕੋਈ ਐਸਾ ਜੌਹਰ ਦਿਖਾਵਾਂਗੇ...
ਹੈ ਮੰਜਿਲ ਹਾਲੇ ਦੂਰ ਬੜੀ ਪਰ 'ਭੰਗੂ" ਮੈਂ ਵੀ ਮੁੜਨਾ ਨਹੀਂ...
ਜੇ ਹਿੰਮਤ ਹੈ ਤਾਂ ਆ ਸੱਜਣਾ ਕਚਿੱਆਂ ਤੇ ਤਰਕੇ ਜਾਵਾਂਗੇ...
ਧੰਨਵਾਦ
ਤੁਹਾਡਾ ਆਪਣਾ
ਅਮਨ ਭੰਗੂ