ਕੁਝ ਦਿਨ ਪਹਿਲਾ ਮੈਂ ਆਪਣੇ ਦੋਸਤਾਂ ਨਾਲ ਕਾਲਜ ਤੋਂ ਘਰ ਵਾਪਿਸ ਆ ਰਿਹਾ ਸੀ ॥ ਸਾਡੇ ਕੋਲੋਂ ੲਿੱਕ ਜੀਪ ਲੰਘੀਂ, ਜਿਸ ਤੇ ਪੂਰੇ ਸਿੱਖੀ ਬਾਣੇ ਵਿੱਚ ਸਜਿਆ ਸਿੰਘ ਨਗਾਰਾ ਵਜਾ ਰਿਹਾ ਸੀ॥ ਪੁੱਛਣ ਤੇ ਪਤਾ ਲੱਗਾ ਕਿ ਗੁਰਦੁਆਰਾ ਭਗਤ ਨਾਮਦੇਵ ਜੀ ਵੱਲੋਂ ਭਗਤ ਨਾਮਦੇਵ ਜੀ ਦੇ ਜਨਮ ਦਿਨ ਦੇ ਸਬੰਧ ਵਿੱਚ ਅੱਜ ਨਗਰ ਕੀਰਤਨ ਕੱਢਿਆ ਜਾ ਰਿਹਾ ਹੈ॥ ਮਨ ਵਿੱਚ ਬਹੁਤ ਖੁਸ਼ੀ ਹੋਈ ਤੇ ਰੋਸ ਵੀ ਹੋਇਆ ਕਿ ਗੁਰਦੁਆਰਾ ਸਾਹਿਬ ਦੀ ਪ੍ਰਬੰਧਕ ਕਮੇਟੀ ਵੱਲੋਂ ਸ਼ਹਿਰ ਵਿੱਚ ਕੋਈ ਅਨਾਊਸਮੈਂਟ ਨਹੀਂ ਕਰਵਾਈ ਗਈ॥
ਘਰ ਜਾਣ ਦਾ ਖਿਆਲ ਦਿਲੋਂ ਕੱਢ ਕੇ ਅਸੀ ਸਾਰੇ ਜਲਦੀ ਨਾਲ ਗੁਰਦੁਆਰਾ ਸਿੰਘ ਸਭਾ ਵਿਖੇ ਪਹੁੱਚੇ॥ ਨਗਰ ਕੀਰਤਨ ਦੇ ਸਵਾਗਤ ਲਈ ਗੁਰਦੁਆਰਾ ਸਾਹਿਬ ਦੀ ਪ੍ਰਬੰਧਕ ਕਮੇਟੀ ਵੱਲੋਂ ਕੋਈ ਪ੍ਰਬੰਧ ਨਾ ਹੋਣ ਤੇ ਸਾਨੂੰ ਸਭ ਨੂੰ ਹੋਰ ਵੀ ਹੈਰਾਨੀ ਹੋਈ॥ ਮੇਰੇ ਨਾਲ ਕੁੱਝ ਹਿੰਦੂ ਪਰਿਵਾਰਾਂ ਨਾਲ ਸਬੰਧ ਰੱਖਣ ਵਾਲੇ ਵੀਰ ਵੀ ਸਨ ॥ ਜਦੋਂ ਅਸੀਂ ਗੁਰਦੁਆਰਾ ਸਾਹਿਬ ਦੇ ਬਾਹਰ ਨਗਰ ਕੀਰਤਨ ਦੇ ਸਵਾਗਤ ਲੲੀ ਤੇ ਸੰਗਤਾਂ ਦੀ ਸੇਵਾ ਲਈ ਪੀਣ ਵਾਲੇ ਪਾਣੀ ਦਾ ਪ੍ਰਬੰਧ ਕਰਨ ਲੱਗੇ ਤਾਂ ਗੁਰਦੁਆਰਾ ਸਾਹਿਬ ਦੇ ਗ੍ਰੰਥੀ ਸਿੰਘ ਦੀ ਗੱਲ ਸੁਣਕੇ ਅਸੀਂ ਸਭ ਹੈਰਾਨ ਰਹਿ ਗੲੇ ॥ ਉਹ ਸਾਨੂੰ ਕਹਿਣ ਲੱਗਾ ਕਿ "ਕੋਈ ਲੋੜ ਨਹੀਂ ਪਾਣੀ ਲਗਾਉਣ ਦੀ, ਜਦੋਂ ਆਪਣਾ ਨਗਰ ਕੀਰਤਨ ਨਿਕਲੇਗਾ ਉਦੋਂ ਲਗਾ ਲੈਣਾ"॥
ਅਸੀਂ ਸਭ ਉਸਦੀ ਇਹ ਗੱਲ ਸੁਣਕੇ ਹੈਰਾਨ ਰਹਿ ਗਏ ਤੇ ਮੇਰੇ ਨਾਲ ਦੇ ਹਿੰਦੂ ਵੀਰ ੲਿਹ ਗੱਲ ਸੁਣਕੇ ਮੇਰੇ ਮੂੰਹ ਵੱਲ ਦੇਖਣ ਲੱਗੇ, ਜਦੋਂ ਕਿ ਮੈਂ ੳੁਹਨਾਂ ਨੂੰ ਕੋਈ ਜਵਾਬ ਨਾ ਦੇ ਸਕਿਆ ॥ ਜਦੋਂ ਮੈਂ ਗ੍ਰੰਥੀ ਸਿੰਘ ਨੂੰ ਕਿਹਾ ਕੇ ਗੁਰਦੁਆਰਾ ਸਾਹਿਬ ਤਾਂ ਸਭ ਦੇ ਸਾਝੇਂ ਹੁੰਦੇਂ ਹਨ ਤਾਂ ਉਹ ਸਾਨੂੰ ਕੋਈ ਢੰਗ ਦਾ ਜਵਾਬ ਨਾ ਦੇ ਸਕਿਆ ॥ ਮੇਰੇ ਮਨ ਵਿੱਚ ਗ੍ਰੰਥੀ ਸਿੰਘ ਦੀ ਕਹੀ ਗੱਲ ਸੂਲ ਵਾਂਗ ਚੁੱਭ ਰਹੀ ਸੀ ਤੇ ਸੇਵਾ ਕਰਨ ਤੋਂ ਬਾਅਦ ਅਸੀਂ ਸਾਰੇ ਸਾਮਾਨ ਸੰਭਾਲ ਕੇ ਤੇ ਉਸ ਕਹੀ ਗੱਲ ਨੂੰ ਭੁੱਲ ਕੇ ਨਗਰ ਕੀਰਤਨ ਵਿੱਚ ਜਾ ਰਲੇ॥
ੲਿੱਕ ਸਿੰਘ ਮਾਿੲਕ ਤੇ ਸ਼ਬਦ ਗਾਇਨ ਕਰ ਰਿਹਾ ਸੀ " ਸਭੈ ਸਾਝੀਵਾਲ ਸਦਾਇਨਿ ਕੋੲਿ ਨਾ ਦੀਸਹਿ ਬਾਹਰਾ ਜੀਉ "॥ ਅਸੀਂ ਸਭ ਵੀਂ ਨਾਲ-ਨਾਲ ਗਾੳੁਣ ਲੱਗੇ ॥ ਕੁੱਝ ਦੇਰ ਬਾਅਦ ਗੁਰਦੁਆਰਾ ਭਗਤ ਨਾਮਦੇਵ ਜੀ ਗੁਰਦੁਆਰਾ ਸਾਹਿਬ ਦੇ ਕਮੇਟੀ ਮੈਂਬਰ ਦਾ ਮੁੰਡਾ ਮੈਂਨੂੰ ਆ ਕਿ ਕਹਿਣ ਲੱਗਾ ਕਿ ਤੁਹਾਡੇ ਗੁਰਦੁਆਰਾ ਸਾਹਿਬ ਦਾ ਨਗਰ ਕੀਰਤਨ ਕਿਸ ਦਿਨ ਹੈ?? ਉਸਦੇ ਮੂਹੋਂ ਵੀ ਮੈਂ ਇਹ ਗੱਲ ਸੁਣਕੇ ਹੈਰਾਨ ਰਹਿ ਗਿਆ ਤੇ ਮੇਰੇ ਨਾਲ ਦੇ ਹਿੰਦੂ ਵੀਰ ਫਿਰ ੲਿਹ ਗੱਲ ਸੁਣਕੇ ਮੂੰਹ ਵੱਲ ਦੇਖਣ ਲੱਗੇ, ਜਦੋਂ ਕਿ ਮੈਂ ਸ਼ਰਮ ਦਾ ਮਾਰਾ ਉਹਨਾਂ ਨਾਲ ਨਜ਼ਰ ਵੀ ਨਹੀਂ ਮਿਲਾ ਰਿਹਾ ਸੀ॥
ਮੈਂ ਹੁਣ ਇਹ ਸੋਚਣ ਤੇ ਮਜ਼ਬੂਰ ਹੋ ਗਿਆ ਹਾਂ ਮੇਰਾ ਕਿਹੜਾ ਗੁਰਦੁਆਰਾ ਹੈ, ਤੇ ਬਾਬੇ ਨਾਨਕ ਦਾ ਸਿੱਖ ਕਿਹੜਾ ਹੈ ??
ਜੀਤ ਰਾਮਗੜ੍ਹੀਆ
3-11-2014
|
