Udeek
ਉਡੀਕ
ਧੁਖਦੀ ਦੁਪਹਿਰ ਕੰਬੇ ਬਿੱਜਲ਼ੀ ਨੇ ਮੱਤ ਮਾਰੀ ,
ਖੋਜੇ ਜਿਹੇ ਰੁੱਖ ਥੱਲੇ ਮੰਜਾ ਸੀ ਮੈਂ ਡਾਹ ਲਿਆ ।
ਲੰਘੀਆਂ ਬਥੇਰੀਆਂ ਸੀ ਘੁੱਗੀਆਂ ਘਟਾਰਾਂ ਉੱਤੋਂ,
ਚੁੱਪ ਚਾਂ ਨੂੰ ਤੋੜਦਾ ਵਾ ਜੋੜਾ ਇੱਕ ਆ ਗਿਆ ।
ਪਿਛਵਾੜੇ ਰੁੱਖ ਦੀਆਂ ਪੰਜ ਸੱਤ ਟਾਹਣੀਆਂ ,
ਕੱਲੀ ਕੱਲੀ ਟਾਹਣੀ ਚੁੰਮ ਇੱਕ ਉੱਤੇ ਸਾਹ ਲਿਆ ।
ਝੂੰਡ ਸਰਕੰਡੇ ਦੀਆਂ ਗੁੰਦ ਗੁੰਦ ਤਾਰਾਂ ਐਦਾਂ ,
ਸ਼ਾਮ ਤੱਕ ਓਸ ਜੋੜੇ ਆਲ੍ਹਣਾ ਸਜਾ ਲਿਆ ।
ਰੋਜ਼ ਰੋਜ਼ ਵੇਖਾਂ ਹੋਰ ਵਧੀ ਜਾਵੇ ਆਲ੍ਹਣਾ ,
ਤੀਲਿਆਂ ਦੀ ਮੀਨਾਕਾਰੀ ਮੈਨੂੰ ਵੀ ਰਿਝਾ ਲਿਆ ।
ਅੱਠ ਦਿਨ ਪੂਰੇ ਹੋਏ ਅੱਜ ਤੱਕ ਗਿਣਵੇਂ ,
ਨਿੱਤ ਦੀਆਂ ਤਹਿਆਂ ਤੋਂ ਹਿਸਾਬ ਮੈਂ ਲਗਾ ਲਿਆ ।
ਕਿਥੇ ਉਹਨਾਂ ਮੇਲ ਕੀਤਾ ਕਦੋਂ ਦਿੱਤੇ ਆਂਡੜੇ ?
ਪਤਾ ਨਹੀਂ ਕਦੋਂ ਮਾਦਾ ਆਂਡਿਆਂ ਸਿਹਾ ਲਿਆ ।
ਪਤਾ ਲੱਗਾ ਚੀਂ-ਚੀਂ ਦੀਆਂ ਉੱਠੀਆਂ ਆਵਾਜ਼ਾਂ ,
ਬਚਿਆਂ ਲਈ ਉਹਨਾਂ ਐਨਾ ਕੰਮ ਸੀ ਵਧਾ ਲਿਆ ।
ਚੋਗ ਚੁਗ ਚੋਗ ਦੇਣੀ ਬੱਸ ਇਹੋ ਕੰਮ ਰਿਹਾ ,
ਸਾਰਾ ਸਾਰਾ ਦਿਨ ਉਹਨਾਂ ਕਿਧਰੇ ਲੰਘਾ ਲਿਆ ।
ਫੜ ਫੜ ਹੋਈ ਓਏ ਤੁਸੀਂ ਕਿੱਥੇ ਉੜ ਚੱਲੇ ?
ਮਾਰ ਮਾਰ ਝੂਟੇ ਉਹਨਾਂ ਆਲ੍ਹਣਾ ਹਿਲਾ ਲਿਆ ।
ਇਹਦੇ ਵਿੱਚ ਮੁੜ ਹੋਰ ਕਿਸੇ ਨਹੀਂ ਆਵਣਾ ,
ਨਵੇਂ ਦੀ ਉਡੀਕ ਵਿੱਚ ਆਲ੍ਹਣਾ ਮੈਂ ਲਾਹ ਲਿਆ ।
ਮਾਵੀ
|