ਪੂਜਾ ਘਰ ਖਾਲੀ ਕਿਉਂ?

(A tribute to the mortal gods)

ਬੰਦ ਨੇ ਦੇਹੁਰੇ, ਚਰਚ, ਮਸੀਤਾਂ

ਬੰਦ ਨੇ ਗੁਰਦਵਾਰੇ ਤੇ ਮੰਦਰ

ਰੱਬ ਤੇ ਸਾਰੇ ਦੇਵਤਿਆਂ 'ਚੋਂ 

ਕੋਈ ਵੀ ਨੀ ਕਿਉਂ ਇਨ੍ਹਾਂ ਅੰਦਰ?

ਹੱਥ ਦਸਤਾਨੇ, ਮੂੰਹ ਤੇ ਮਾਸਕ

ਕੋਟ ਦੂਧੀਆ ਪਾ ਕੇ (ਦੂਧੀਆ - White)

ਛੱਡ ਦੇਵਤੇ ਆਸਨ, ਬੈਠੇ 

ਹਸਪਤਾਲਾਂ ਵਿਚ ਆ ਕੇ |

ਚਿੱਟੇ ਨੀਲੇ ਖ਼ਾਕੀ ਧਾਰੀ (ਪੁਲਿਸ , ਹੈਲਥਕੇਅਰ ਅਤੇ ਸਫ਼ਾਈ ਵਰਕਰ ਆਦਿ)

ਸੋਹਣਾ ਫਰਜ਼ ਨਿਭਾ ਰਹੇ

ਜਾਗਦਿਆਂ ਤੇ ਸੁਪਨੇ ਆ ਕੇ

ਕੰਮ ਦੀ ਗੱਲ ਸਮਝਾ ਰਹੇ - 

‘ਘਰੋਂ ਬਾਹਰ ਹਾਂ ਆਪ ਲਈ

ਨਾ ਮੌਤ ਸਹੇੜਨੋਂ ਝਕਦੇ

ਘਰ 'ਚ ਰਹਿ ਕੇ ਸੇਫ਼ ਰਹੋ !

ਤੁਸੀਂ ਐਨਾ ਨਹੀਂ ਕਰ ਸਕਦੇ?’

ਡਾਕਟਰ ਦੀ ਮੱਤ ਦਿੱਤੀ ਹੋਈ 

ਹੁਕਮ ਜਾਣੀਏ ਰੱਬ ਦਾ

ਇਹ ਤੋੜੇਗੀ ਚੇਨ ਕੋਰੋਨਾ

ਇਸ 'ਚ ਭਲਾ ਹੈ ਸਭ ਦਾ |

ਸਹਿਮਣ ਨਾਲੋਂ ਮੰਨਣਾ ਚੰਗਾ

ਮੰਨਣ ਨਾਲੋਂ ਕਰਨਾ

ਬਚਨੇ ਦਾ ਗੁਰ ਜਾਣ ਗਏ

ਫ਼ਿਰ ਕਿਉਂ ਐਵੇਂ ਈ ਮਰਨਾ?

ਛੇ ਕੁ ਫੁੱਟ ਦੀ ਵਿੱਥ ਰੱਖਣ ਨੂੰ

ਲਕਸ਼ਮਣ ਰੇਖਾ ਵਾਹੀਏ

ਮੌਤ-ਸੁਨਾਮੀ ਦੀਆਂ ਲਹਿਰਾਂ ਨੂੰ

ਮਿਲਜੁਲ ਕੇ ਠੱਲ੍ਹ ਪਾਈਏ |

ਜਗਜੀਤ ਸਿੰਘ ਜੱਗੀ

ssa sir g aap g valon ajoke sameh bare bohat hi sanvedansheel atte bhavnatmak kavita di sirjana kitti gayi hai,.............jo lekhak di kalam nu ik lambi umar bakhshish kardi hai,..............jio ustaad saab g,..............

ਧੰਨਭਾਗ, ਸੁਖਪਾਲ ਬਾਈ ਜੀ ! ਕੁਲ ਸੰਸਾਰ ਇਸ ਵੇਲੇ ਮਹਾਮਾਰੀ ਰੂਪੀ ਮੁਸ਼ਕਲ ਨਾਲ ਜੂਝ ਰਿਹਾ ਹੈ |

ਡਾਕਟਰਾਂ ਅਤੇ ਹੋਰ ਸਹਾਇਕ ਸੇਵਾਵਾਂ ਵਿਚ ਰੁੱਝੇ ਹੋਏ ਅਮਲੇ ਨੂੰ ਸਾਡਾ ਸਲਾਮ - ਉਹ ਆਪਣਾ ਸਭ ਕੁਝ ਦਾਅ ਤੇ ਲਾਕੇ ਇਨਸਾਨੀਅਤ ਦੀ ਸੇਵਾ ਕਰ ਰਹੇ ਹਨ; ਉਹ ਧੰਨ ਹਨ |

 

ਸਾਨੂੰ ਵੀ ਅਨੁਸ਼ਾਸਨ ਵਿਚ ਰਹਿ ਕੇ ਉਨ੍ਹਾਂ ਦੀ ਮਦਦ ਅਤੇ ਆਪਣੀ ਸੁਰੱਖਿਆ ਸੁਨਿਸ਼ਚਿਤ ਕਰਨੀ ਚਾਹੀਦੀ ਹੈ | 

 

ਕਿਰਤ ਵਾਚ ਕੇ ਹੌਂਸਲਾ ਅਫ਼ਜ਼ਾਈ ਲਈ ਸ਼ੁਕਰੀਆ |

ਰੱਬ ਰਾਖਾ !