ਤੇਰੇ ਅੱਗੇ ਪਿੱਛੇ ਵਾਂਗ ਸੁਦਾਈਆਂ ਭਾਉਂਦਾ ਸਾਂ,
ਅੜੀਏ ਨੀ ਤੇਰੇ ਨਾਂ ਦੇ ਸੋਹਲੇ ਗਾਉਂਦਾ ਸਾਂ..

ਬਿਨਾ ਵਜ੍ਹਾ ਈ ਤੈਨੂੰ ਏਨਾ ਪਿਆਰ ਕਰਾਂ
ਤੇ ਕਿਸਮਤ ਉੱਤੇ ਭੋਰਾ ਨਾ ਇਤਬਾਰ ਕਰਾਂ
ਦੂਰੋਂ ਈ ਤੈਨੂੰ ਤੱਕ ਕੇ ਮੰਨ ਪਰਚਾਉਂਦਾ ਸਾਂ
ਅੜੀਏ ਨੀ ਤੇਰੇ ਨਾਂ ਦੇ ਸੋਹਲੇ ਗਾਉਂਦਾ ਸਾਂ..

ਤੇਰਾ ਫੇਰ ਦੋਬਾਰਾ ਨਾਲ ਮੇਰੇ ਪੈ ਮੋਹ ਜਾਵੇ
ਤੇਰੇ ਮੁਖੜੇ ਤੋਂ ਨਾਂ ਰੰਗ ਸੰਦੂਰੀ ਚੋ ਜਾਵੇ
ਮੰਗਣਾ ਮੈਂ ਰਬ ਤੋਂ ਹਰ ਦੱਮ ਇਹੀ ਚਾਉਂਦਾ ਸਾਂ
ਅੜੀਏ ਨੀ ਤੇਰੇ ਨਾਂ ਦੇ ਸੋਹਲੇ ਗਾਉਂਦਾ ਸਾਂ..

ਨਾ ਦਿਲ ਦਾ ਤੇਰੇ ਬਾਜੋਂ ਕੋਈ ਟਿਕਾਣਾ ਨੀਂ

ਚੇਤੇ ਤੈਨੂੰ ਕਰਦਾ ' ਦੀਪ ' ਨੀਮਾਣਾ ਨੀਂ
ਰੱਬ ਤੋਂ ਪਹਿਲਾਂ ਤੇਰਾ ਨਾਂਮ ਧਿਆਉਂਦਾ ਸਾਂ
ਅੜੀਏ ਨੀ ਤੇਰੇ ਨਾਂ ਦੇ ਸੋਹਲੇ ਗਾਉਂਦਾ ਸਾਂ..

ਫੱਟ ਜਿਗ਼ਰ ਦੇ ਕਿਹਨੂੰ ਦੱਸ ਦਿਖਾਵਾਂ ਮੈਂ
ਉਧੜੇ ਦਿਲ ਨੂੰ ਯਾਦਾਂ ਦੇ ਤੋਪੇ ਲਾਵਾਂ ਮੈਂ
ਅੱਜ ਵੀ ਜਿੰਦੇ ਓਨਾ ਹੀ ਤੈਨੂੰ ਪਿਆਰ ਕਰਾਂ
ਅੱਜ ਵੀ ਤੇਰੇ ਨਾਂ ਦੇ ਸੋਹਲੇ ਗਾਵਾਂ ਮੈਂ.....

-ਗਗਨ ਦੀਪ ਢਿੱਲੋਂ-

ਗਗਨਦੀਪ ਜੀ, ਤੁਸੀਂ ਤਾਂ ਇਸ ਕਿਰਤ "ਇਬਾਦਤ" ਨਾਲ ਗਗਨ ਵਿਚ ਦੀਵਾ ਬਾਲ ਤਾਂ ਬਾਈ ਜੀ ਮੁਹੱਬਤ ਦੇ ਨਾਂ ਦਾ | ਬਹੁਤ ਵਧੀਆ ਥੀਮ ਅਤੇ ਸੋਹਣੀ ਫੱਬਦੀ ਲਿਖਤ |

ਤੇ ਉੱਨੀਂ ਹੀ ਸ਼ਿੱਦਤ ਨਾਲ "ਮੀਟਰ" ਦਾ ਖਿਆਲ ਵੀ ਰੱਖਿਆ - ਬਸ ਅਖੀਰਲੇ ਬੰਦ ਵਿਚ ਮੀਟਰ ਤੋਂ ਭਟਕੇ ਹੋ, ਰਤਾ ਕੁ | ਆਪ ਕਿਰਤ ਦੇ ਜਨਕ ਹੋ ਇਸ ਕਰਕੇ ਸਾਰੇ ਅਧਿਕਾਰ ਤੁਹਾਡੇ ਹਨ | ਬਸ ਪਾਠਕ ਦੀ ਹੈਸੀਅਤ ਨਾਲ ਨਿੱਕੀ ਜਿਹੀ ਸਲਾਹ ਦੇਣ ਦਾ ਜੇਰਾ ਕਰ ਰਿਹਾ ਹਾਂ; ਜਾਂ ਕਹਿ ਲਉ ਗੁਸਤਾਖੀ |

"ਫੱਟ ਜਿਗ਼ਰ ਦੇ ਕਿਹਨੂੰ ਦੱਸ ਦਿਖਾਵਾਂ ਮੈਂ

ਉਦੜੇ ਦਿਲ ਨੂੰ ਯਾਦਾਂ ਦੇ ਤੋਪੇ ਲਾਵਾਂ ਮੈਂ

ਅੱਜ ਵੀ ਜਿੰਦੇ ਓਨਾ ਹੀ ਤੈਨੂੰ ਪਿਆਰ ਕਰਾਂ

ਅੱਜ ਵੀ ਤੇਰੇ ਨਾਂ ਦੇ ਸੋਹਲੇ ਗਾਵਾਂ ਮੈਂ....."

ਮੀਟਰ ਨੂੰ ਇਸ ਜੁਗਤ ਨਾਲ ਬਰਕਰਾਰ ਰੱਖ ਸਕਦੇ ਹਾਂ ਜੇ ਪਸੰਦ ਹੋਵੇ...ਨਹੀਂ ਤਾਂ ਉਂਝ ਵੀ ਕਿਰਤ ਬਹੁਤ ਖੂਬਸੂਰਤ ਹੈ |

"ਫੱਟ ਜਿਗ਼ਰ ਦੇ ਕਿਹਨੂੰ ਦੱਸ ਦਿਖਾਵਾਂ ਮੈਂ,

ਉਧੜੇ ਦਿਲ ਨੂੰ ਯਾਦਾਂ ਦੇ ਤੋਪੇ ਲਾਵਾਂ ਮੈਂ,

ਅੱਜ ਵੀ ਜਿੰਦੇ ਤੇਰਾ ਨੇਹੁ ਪੁਗਾਉਂਦਾ ਹਾਂ,

ਅੱਜ ਵੀ ਤੇਰੇ ਨਾਂ ਦੇ ਸੋਹਲੇ ਗਾਉਂਦਾ ਹਾਂ....."

ਬਹੁਤ ਖ਼ੂਬ ਵੀਰ ਜੀ, ਬਸ ਏਦਾਂ ਈ ਮਾਰਗ ਦਰਸ਼ਨ ਕਰਦੇ ਰਿਹੋ ਜੀ..
ਧੰਨਵਾਦ

THANKS MANINDER JI

very well written,.............superb creation

likhde raho ,.................parhde raho,...........sahitik saanjh da uprala karde raho

hor vi khoob likho,...........

zindabaad