ਮਜਦੂਰਾਂ ਦਾ ਵੀ ਕਦੇ
ਕੋਈ ਦਿਵਸ ਹੋਇਐ
ਇਹ ਤਾਂ ਹਮੇਸ਼ਾ ਹੁੰਦੇ ਐ
ਸਰਕਾਰਾਂ ਦੇ ਤੇ ,ਸਾਲੇ
ਸਰਕਾਰੀ ਚਮਚਿਆਂ ਦੇ
ਅੱਜ ਫ਼ੇਰ ਸਾਰੇ ਦੇਸ ਚ੍
ਇੱਕ ਵਾਰ ਫ਼ੇਰ ਮਜਦੂਰ ਦਿਵਸ
ਦੇ ਨਾਂ ਤੇ ਕੱਢਿਆ ਜਾਏਗਾ
ਮਜਦੂਰਾਂ ਦਾ ਜਲੂਸ
ਏ.ਸੀ ਗੱਡੀਆਂ ਤੇ ਏ.ਸੀ
ਕਮਰਿਆਂ ਤੇ ਮਖਮਲੀ ਸੇਜਾਂ
ਦਾ ਆਨੰਦ ਲੈਣ ਵਾਲੇ
ਕਰਨਗੇ ਮਜਦੂਰਾਂ ਦੇ
ਹੱਕਾਂ ਦੀਆਂ ਗੱਲਾਂ ,ਤੇ
ਦੱਸਣਗੇ ਆਪਣੇ-ਆਪ ਨੂੰ
ਮਜਦੂਰਾਂ ਦੇ ਸਭਤੋਂ
ਵੱਡੇ ਹਮੈਤੀ

ਓ ਲੱਖ ਲਾਹਨਤ ਐ ਥੋਡੇ ਤੇ
ਸਰਕਾਰ ਦਿਓ ਕੁੱਤਿਓ
ਜੋ ਨਹੀਂ ਟਲਦੇ ਐਥੇ ਵੀ
ਰਾਜਨੀਤੀ ਕਰਨੋਂ
ਕਿਉਂ ਨਹੀਂ ਦਿਸਦੀਆਂ ਤੁਹਾਨੂੰ
ਉਹਨਾਂ ਦੀਆਂ  ਲਕੀਰਾਂ
ਤੋਂ ਸੱਖਣੀਆਂ ਤਲੀਆਂ
ਕਿਉਂ ਭੁੱਲ ਜਾਨੇਂ ਓਂ
ਸਮਾਜ ਦੀਆਂ ਨੀਹਾਂ ਨੂੰ
ਕਿਉਂ ਸਿਰਫ਼ ਇੱਕ ਹੀ ਯਾਦ ਰਹਿੰਦੈ
ਤੁਹਾਨੂੰ ਸਾਰੇ ਸਾਲ ਵਿੱਚ
ਓਏ ਬੇ-ਗੈਰਤੋ ਕਦੇ ਤਾਂ
ਅਹਿਸਾਨ ਮੰਨੋ ਇਹਨਾਂ ਦਾ
ਜੋ ਸਿਰਫ਼ ਇੱਕ ਦਿਨ ਦੀ
ਪਛਾਣ ਬਦਲੇ ,ਬਣਦੇ ਨੇ
ਤੁਹਾਡੇ ਸਾਰੇ ਸਾਲ ਦੀਆਂ
ਸੁੱਖ ਸਹੂਲਤਾਂ ਦੇ ਕਾਰਨ

ਮਜਦੂਰ ਸਾਰਾ ਸਾਲ ਰੁਲਦੈ
ਜ਼ਿੱਲਤ ਭਰੀ ਜੂਨ ਹੰਢਾਉਂਦੈ
ਬੁਰਕੀ-ਬੁਰਕੀ ਲਈ ਕਰਦੈ
ਖੂਨ ਪਸੀਨੇਂ ਨੂੰ ਇੱਕਸੁਰ
ਮਰਦੇ ਦਮ ਤੱਕ ਜਾਰੀ ਰਹਿੰਦੈ
ਉਹਦਾ ਰੋਟੀ ਤੱਕ ਦਾ ਸਫ਼ਰ
ਕਿਉਂਕਿ ਇਹੀ ਐ ਉਹਦਾ ਕਰਮ
ਤੇ ਉਹ ਮੂੰਹ ਨਹੀਂ ਮੋੜਦਾ
ਕਦੇ ਆਪਣੀਆਂ ਜਿੰਮੇਵਾਰੀਆਂ ਤੋਂ
ਸਦਾ ਹੀ ਹਿੱਸਾ ਬਣਦੈ
ਇੱਕ ਚੰਗੇ ਸਮਾਜ ਦੀ
ਉਸਾਰੀ ਲਈ

ਓਏ ਦੁਨੀਆਂ ਵਾਲਿਓ ਇਹੀ ਨੇ
ਸਾਡੇ ਸਮਾਜ ਦੇ ਸਿਰਜਣਹਾਰ
ਸਾਡੇ ਕਿਰਤੀ ਕਾਮੇ
ਮਿਹਨਤਕਸ਼ |

| ਨਿਮਰਬੀਰ ਸਿੰਘ |

| ਜ਼ਿੰਦਾਬਾਦ ਕਿਰਤੀ |