ਪਰਤੋਗੇ ਜਦ ਕਦੇ ਘਰੀਂ ਤੁਸੀਂ,
ਦੀਵਿਆਂ ਚੋਂ ਤੇਲ ਮੁੱਕਿਆ ਹੋਓ,
ਖੜਕੇ ਤੋੰ ਤ੍ਰਾਹ ਨਿਕਲ ਜਾਣਗੇ,
ਸਾਹਮਣੇ ਕਿੱਲੀ ਤੇ ਟੰਗੇ ਰੱਸੇ ਨੂੰ ਤੱਕਦੀ
ਅਤੇ ਨਿਆਣਿਆਂ ਵੱਲ ਝਾਕਦੀ,
ਅੱਖਾਂ ਨੂੰ ਮਲਦੀ ਬੁੜ ਬੁੜ ਕਰਦੀ,
ਸੁੱਕੀਆਂ ਰੋਟੀਆਂ ਨੂੰ ਬੁੱਝੇ ਚੁਲ੍ਹੇ 'ਚ ਸੇਕਦੀ,
ਚੁਲ੍ਹੇ 'ਚ ਫੂਕਾਂ ਮਾਰਦੀ,
ਭਾਂਡਿਆਂ ਦੇ ਖੜਾਕ ਤੋਂ ਪ੍ਰੇਸ਼ਾਨ ਲਗਦੀ,
ਝੱਟਕੇ ਨਾਲ ਚੁੰਨੀ ਦੇ ਪੱਲੇ ਨੂੰ ਖਿੱਚ,
ਗੁੱਸੇ ਨਾਲ ਅੱਧਾ ਘੁੰਡ ਕੱਢਦੀ,
ਥਾਲੀ ਵਿੱਚ ਦੋ ਰੋਟੀਆਂ ਵਗਾਹ ਮਾਰਦੀ,
ਪੁੱਛਦੀ "ਆ ਗਿਐ ਅੱਧੀ ਰਾਤੇ"
ਹੁਣੇ ਵਿੱਕਿਐ ਝੋਨਾ ਮਿੱਟੀ ਦੇ ਭਾਅ,
ਪੈਸੇ ਪਤਾ ਨਹੀਂ ਕਦੋਂ ਦਿੰਦੈ ਆੜਤੀਆ,
ਚੱਲ ਸੌਂ ਜਾ ਨਿਆਣਿਆਂ ਨਾਲ,
ਸਵੇਰੇ ਜਾਣੈ ਧਰਨੇ ਤੇ,
ਉਝ ਕੁਝ ਬਣਨਾ ਨਹੀਂ ਸੰਘਰਸ਼ ਤੋਂ ਬਗੈਰ,
ਅਲਾਣਾ ਮੰਜਾ ਚੀਕਿਆ,
ਤੇ ਉਹ ਸੁੱਤਾ ਪਿਆ ਬੁੜ ਬੁੜਾਇਆ,,
ਕਿਸਾਨ ਸੰਘਰਸ਼ ਜਿੰਦਾਬਾਦ ................

ਕਿਸਾਨ ਸੰਘਰਸ਼ ਜਿੰਦਾਬਾਦ