ਇੱਕ ਵਾਰ ਫਿਰ ਤੋਂ ਹਾਜ਼ਿਰ ਹਾਂ ਜੀ...ਤੇ ਇਸ ਵਾਰ ਕੋਸ਼ਿਸ਼ ਕੀਤੀ ਹੈ
ਮਿਹਨਤ ਕਸ਼ ਤੇ ਲੁੱਟੇ ਜਾਣ ਵਾਲਿਆਂ ਦੀ ਅਵਾਜ਼ ਨਾਲ ਹਾਂ ਮਿਲਾਉਣ ਦੀ ਅਤੇ ਹਾਕਮਾਂ, ਧਰਮ ਦੇ ਠੇਕੇਦਾਰਾਂ, ਤੇ ਸਾਮਰਾਜਵਾਦ ਪੱਖੀ ਮੀਡੀਆ ਨਾਲ ਵਖਰੇਵਾਂ ਦਰਸਾਉਣ ਦੀ...ਉਮੀਦ ਹੈ ਸਵੀਕਾਰ ਕਰੋਗੇ...ਤੇ ਹਾਂ ਤੁਹਾਡੇ ਕੀਮਤੀ ਸੁਝਾਵਾਂ ਦੀ ਉਡੀਕ ਰਹੇਗੀ...ਹਾਂ ਵਿਚਾਰਾਂ ਦਾ ਵਖਰੇਵਾਂ ਕਿਸੇ ਨਾਲ ਵੀ ਹੋ ਸਕਦਾ ਹੈ...ਇਸ ਲਈ ਬੇਨਤੀ ਹੈ ਕਿ ਇਸਨੂੰ ਕਿਸੇ ਖਾਸ ਵਿਅਕਤੀ ਦੇ ਵਿਰੋਧ ਤੇ ਤੌਰ ਤੇ ਨਾ ਲਿਆ ਜਾਵੇ |
ਬਗਾਵਤ ਹਨੇਰਿਆਂ ਤੋਂ ਕਰਦੇ ਰਹਾਂਗੇ,
ਦੀਵੇ ਬਾਲ ਕੇ ਬਨੇਰਿਆਂ 'ਤੇ ਧਰਦੇ ਰਹਾਂਗੇ |
ਤੁਹਾਨੂੰ ਮਲਕ ਭਾਗੋਆਂ ਦੀ ਯਾਰੀ ਮੁਬਾਰਕ,
ਅਸੀਂ ਭਾਈ ਲਾਲੋਆਂ ਸੰਗ ਖੜ੍ਹਦੇ ਰਹਾਂਗੇ |
ਬਗਾਵਤ ਹਨੇਰਿਆਂ ਤੋਂ ਕਰਦੇ ਰਹਾਂਗੇ,
ਦੀਵੇ ਬਾਲ ਕੇ ਬਨੇਰਿਆਂ 'ਤੇ ਧਰਦੇ ਰਹਾਂਗੇ |
ਤੁਸੀਂ ਲਿਖੋ, ਛਾਪੋ ਕਿੱਸੇ, ਲਹੂ ਪੀਣੀਆਂ ਜੋਕਾਂ ਦੇ,
ਅਸੀਂ ਦੱਬੇ ਜਾਂਦਿਆਂ ਦੀ ਗੱਲ ਕਰਦੇ ਰਹਾਂਗੇ |
ਬਗਾਵਤ ਹਨੇਰਿਆਂ ਤੋਂ ਕਰਦੇ ਰਹਾਂਗੇ,
ਦੀਵੇ ਬਾਲ ਕੇ ਬਨੇਰਿਆਂ 'ਤੇ ਧਰਦੇ ਰਹਾਂਗੇ |
ਪਹਿਨ ਧਰਮਾਂ ਤੇ ਜਾਤਾਂ ਦੇ ਨਕਾਬ ਵੰਡ ਪਾਉਂਦੇ,
ਚਿਹਰਾ ਅਸਲੀ ਉਹਨਾਂ ਦਾ ਨੰਗਾ ਕਰਦੇ ਰਹਾਂਗੇ |
ਬਗਾਵਤ ਹਨੇਰਿਆਂ ਤੋਂ ਕਰਦੇ ਰਹਾਂਗੇ,
ਦੀਵੇ ਬਾਲ ਕੇ ਬਨੇਰਿਆਂ 'ਤੇ ਧਰਦੇ ਰਹਾਂਗੇ |
ਅੱਲਾ ਰਾਮ ਤੇ ਰਹੀਮ ਸਾਰੇ ਇੱਕੋ ਜਿਹੇ ਸਾਨੂੰ,
ਗੱਲ ਸਾਂਝੀਵਾਲਤਾ ਦੀ ਅਸੀਂ ਕਰਦੇ ਰਹਾਂਗੇ |
ਬਗਾਵਤ ਹਨੇਰਿਆਂ ਤੋਂ ਕਰਦੇ ਰਹਾਂਗੇ,
ਦੀਵੇ ਬਾਲ ਕੇ ਬਨੇਰਿਆਂ 'ਤੇ ਧਰਦੇ ਰਹਾਂਗੇ |
ਜਿਹੜਾ ਭਗਤ ਸਰਾਭੇ ਵਾਲੇ ਰਸਤੇ 'ਤੇ ਚੱਲੂ,
ਉਹਦੇ ਸਾਹਵਾਂ ਵਿੱਚ ਸਾਹ ਅਸੀਂ ਭਰਦੇ ਰਹਾਂਗੇ |
ਬਗਾਵਤ ਹਨੇਰਿਆਂ ਤੋਂ ਕਰਦੇ ਰਹਾਂਗੇ,
ਦੀਵੇ ਬਾਲ ਕੇ ਬਨੇਰਿਆਂ 'ਤੇ ਧਰਦੇ ਰਹਾਂਗੇ |
"ਬਲਿਹਾਰ" ਜੋਰ ਲਾਈਏ ਲੋਕ ਰਾਜ ਲਿਆਈਏ,
ਇਹ ਕਾਣੀ ਵੰਡ ਕਦੋਂ ਤੀਕ ਅਸੀਂ ਜਰਦੇ ਰਹਾਂਗੇ |
ਬਗਾਵਤ ਹਨੇਰਿਆਂ ਤੋਂ ਕਰਦੇ ਰਹਾਂਗੇ,
ਦੀਵੇ ਬਾਲ ਕੇ ਬਨੇਰਿਆਂ 'ਤੇ ਧਰਦੇ ਰਹਾਂਗੇ |
- ਬਲਿਹਾਰ ਸੰਧੂ
ਮੈਲਬੌਰਨ ਅਸਟਰੇਲੀਆ
22/06/2010