ਪਿਆਰੇ ਦੋਸਤੋ ਅੱਜ ਪਹਿਲੀ ਵਾਰ ਖੁੱਲੀ ਕਵਿਤਾ ਤੇ ਹੱਥ ਅਜ਼ਮਾਈ ਕਰਨ ਦਾ ਯਤਨ ਕੀਤਾ ਹੈ ਜੋ ਆਪ ਸਭ ਦੀ ਕਚਿਹਰੀ 'ਚ ਹਾਜ਼ਰ ਹੈ...
ਕਿਹੋ ਜਿਹਾ ਹੈ ਮੇਰਾ ਯਤਨ? ਪ੍ਰਵਾਨ ਹੈ ਜਾਂ ਨਾਪ੍ਰਵਾਨ ? ਕੀ ਕੀ ਘਾਟਾਂ ਨੇ ? ਕ੍ਰਿਪਾ ਕਰਕੇ ਆਪਣੇ ਵਡਮੁੱਲੇ ਵਿਚਾਰ ਜਰੂਰ ਦੇਣਾ ਜੀ ਮੈਨੂੰ ਉਡੀਕ ਰਹੇਗੀ...
ਲੁੱਟਾਂ, ਖੋਹਾਂ, ਕਤਲ, ਡਕੈਤੀ
ਤੇ ਚੋਰੀ ਸਾਰੇ ਪਾਸੇ ਆਮ ਨੇ
ਸਾਡਾ ਮੁਲਕ ਜੋ
ਤਰਾਂ ਤਰਾਂ ਦੇ ਰੱਬਾਂ ਨਾਲ
ਭਰਿਆ ਪਿਆ ਹੈ
ਉਹਤੇ ਗਰਕਿਆ ਪਿਆ ਹੈ
ਇਹੋ ਜਿਹੀਆਂ ਨਿੱਤ ਹੁੰਦੀਆਂ
ਘਟਨਾਵਾਂ ਦੇ ਨਾਲ
ਅਦਾਲਤਾਂ ਤੇ ਜੇਲ੍ਹਾਂ
ਖਚਾ-ਖਚ ਭਰੀਆਂ ਪਈਆਂ ਨੇ
'ਮੁਜ਼ਰਮਾਂ' ਦੇ ਨਾਲ
ਨਿੱਤ ਹੁੰਦੀਆਂ ਸਜਾਵਾਂ ਦੇ ਬਾਵਜੂਦ
ਇਹ ਘਟਨਾਵਾਂ ਘਟਦੀਆਂ ਕਿਉਂ ਨਹੀਂ
ਮਨ ਦੇ ਅੰਦਰੋਂ ਇੱਕ ਅਵਾਜ
ਆਪ ਮੁਹਾਰੇ ਉੱਠ ਪੈਂਦੀ ਹੈ
ਜੋ ਕਿ ਇੱਕ ਵਾਰ ਨਹੀਂ
ਹਜ਼ਾਰਾਂ ਵਾਰ ਸੁਣੀ ਹੈ
ਆਪਣੇ ਵੱਡੇ ਵਡੇਰਿਆਂ ਤੋਂ
"ਬੰਦਾ ਤਾਂ ਮਿੱਟੀ ਦਾ ਪੁਤਲਾ ਹੈ"
"ਰੱਬ ਦੇ ਹੁਕਮ ਬਿਨਾਂ ਪੱਤਾ ਵੀ ਨੀਂ ਝੁੱਲਦਾ"
ਫਿਰ ਸੋਚਣ ਲੱਗ ਪੈਂਦਾ ਹਾਂ
ਉਹਨਾਂ ਜ੍ਹੇਲ 'ਚ ਸੜ ਰਿਹਾਂ ਵਾਰੇ
ਕੀ ਕਸੂਰ ਹੈ ਇਹਨਾਂ ਦਾ
ਕਿਉਂ ਬੰਦ ਨੇ ਇਹ ਜੇਲ੍ਹਾਂ 'ਚ
ਕੀ ਕਸੂਰ ਹੈ ਏਨਾਂ ਦਾ
ਇੰਨੀਆਂ ਸਖਤ ਸਜਾਵਾਂ ਦੇ ਬਾਵਜੂਦ
ਇਹ ਘਟਨਾਵਾਂ ਕਿਉਂ ਨੀਂ ਘਟਦੀਆਂ
ਮੈਨੂੰ ਉਹ ਸਿਆਣਿਆਂ ਦੀ ਕਹੀ ਗੱਲ
ਵਾਰ ਵਾਰ ਯਾਦ ਆਉਂਦੀ ਹੈ
ਤੇ ਸਹੀ ਵੀ ਲੱਗ ਰਹੀ ਏ
ਕਿ ਅਸੀਂ ਤੇ ਸਜਾਵਾਂ ਦੇਈ ਜਾ ਰਹੇ ਹਾਂ
ਬੇਗੁਨਾਹਾਂ ਨੂੰ ਵਾਰ ਵਾਰ
ਗੁਨਾਹਗਾਰ ਤੇ ਉਹ ਹੈ
ਜਿਸਦੇ ਹੁਕਮ ਬਿਨਾਂ
'ਪੱਤਾ ਤੱਕ ਨੀਂ ਝੁੱਲਦਾ'
ਮੈਨੂੰ ਝੰਜੋੜਦੀ ਰਹਿੰਦੀ ਏ ਮੇਰੀ
ਅੰਤਰ ਆਤਮਾ ਹਰ ਵੇਲੇ
ਕਿ ਕਿਉਂ ਨੀਂ ਲੱਭਦੇ ਅਸੀਂ
ਕਿਸੇ ਐਹੋ ਜਿਹੇ ਜੱਜ ਨੂੰ
ਹਮੇਸ਼ਾਂ ਲਈ ਮੁਕਾਵੇ ਜਿਹੜਾ
ਸਾਡੇ ਏਸ ਜੱਭ ਨੂੰ
ਤੇ ਟੰਗ ਦੇਵੇ ਫਾਹੇ ਜਿਹੜਾ
ਐਹੋ ਜਿਹੇ "ਰੱਬ" ਨੂੰ
ਸਾਨੂੰ ਨੀਂ ਲੋੜ ਐਹੋ ਜੇ
ਤਮਾਸ਼ਬੀਨ ਦੀ
ਜੋ ਖੁਦ ਹੀ ਅਲਾਮਤਾਂ ਲਿਆਉਂਦਾ ਹੈ
ਤੇ ਸਾਨੂੰ ਹਮੇਸ਼ਾਂ
ਆਪਣੇ ਨਾਮ ਤੇ ਵੰਡ ਕੇ
ਖੁਦ ਤਮਾਸ਼ਾ ਦੇਖਦਾ ਰਹਿੰਦਾ ਹੈ
ਮੇਰੀ ਨਿਗ੍ਹਾ 'ਚ ਤੇ
"ਅਸਲੀ ਮੁਜ਼ਰਿਮ ਉਹੀ ਹੈ"
ਜੋ ਇਸ ਸਭ ਨੂੰ
ਕਰਵਾਉਣ ਤੇ ਰੋਕਣਹਾਰ ਹੈ
ਉਹਦਾ ਨਾਮ ਜੋ ਵੀ ਹੈ
ਉਹ ਹੀ ਸਾਡੇ ਤੇ ਵਰਤ ਰਿਹਾ ਹੈ
"ਪਾੜੋ ਤੇ ਰਾਜ ਕਰੋ" ਦੀ ਰਾਜਨੀਤੀ ਨੂੰ
ਮੈਂ ਇਨਕਾਰੀ ਹਾਂ
ਇਹੋ ਜਿਹੇ ਨੂੰ ਰੱਬ ਮੰਨਣ ਤੋਂ
ਜੇਕਰ ਇਹ ਮੇਰਾ ਅਹਿੰਕਾਰ ਹੈ
ਤਾਂ ਵੀ ਮੈਨੂੰ ਆਪਣੇ
ਸੋਚਣ ਦੇ ਢੰਗ ਤੇ ਮਾਣ ਹੈ.....
--------Balihar Sandhu
--------Melbourne
--------03/04/2011